Shillong, K’kyngkot 16
Ka lympung ïalehkai Third Division Cricket League 2024-25 ba la pynïaid da ka Shillong Cricket Associa-tion (SCA) ka la nangjam shaphrang ha kaba ka FSB bad ka Momentum ki la ïoh jingjop ha ka Sngi Palei.
Ha kane ka jingïakhun kaba la long ha madan Urkaliar, Shillong, ka FSB ka la pynliem noh ïa ka SCA (A) da 36 run. Ka FSB kaba la kam trai ban tied nyngkong, ka la ïoh 193 run bad shah pynhap 9 wiket ha ki 20 over. Kane ka la wan urlong lyngba ka jingïalehkai bha u Vishal Warjri uba la khyrwit ïa ka shiteng spah kaba 61 run na ki 31 bol bad Sandip Paul u la ïoh 31 run na ki 13 bol. Katba u Saktiam Hajong u la shim 4 wiket bad 2 wiket da u Amul Kumar na ka bynta ka SCA (A).
Haba wan beh ïa ka thong ba la buh da ka liang pyrshah, ka SCA (A) ka la ïoh tang 157 run bad shah pynhap 7 wiket ha ki 20 over. U Prince Ray u la tied 74 run na ki 45 bol bad u Sagar Solanki u la ïoh 21 run na ki 20 bol. Katba u Vishal Warjri u la shim 2 wiket na ka bynta ka FSB bad ïohpdiang ruh ïa ka nam ‘Player of the Match’.
Haba phai sha kawei pat ka jingïakhun ba ar, ka Momentum ka la jop da 8 run ïa ka Dynamite CC. Ka Momentum kaba la shimti ban tied nyngkong ka la ïoh 201 run bad shah pynhap 8 wiket ha ki 20 over. U Hamid Sohtun u la tied 37 run na ki 26 bol bad u Wansuklang Shullai u la ïoh 36 run na ki 15 bol.
Haba wan shimti ïa ka pali ba ar, ka Dynamite ka la ïoh tang 193 run bad shah pynhap 7 wiket ha ki 20 over.
