Shillong, K’lyngkot 16
Ka madan ïalehkai kriket jong ka Alotgre kaba ha Tura kan pynlong ïa ka jingïalehkai ba nyngkong jong ka BCCI hapdeng ka Meghalaya pyrshah ïa ka Bengal ha ka lympung ïalehkai U-23 Col CK Nayudu Trophy 2024-25 ka ban sdang naduh ka 25 tarik mynta u bnai.
Kane ka la long ka jingangnud kaba la slem bha jong ka Meghalaya Cricket Association bad ka Tura District Cricket Association ban wanrah ïa ka lympung ïalehkai jong ka BCCI sha Garo Hills bad ka jingtrei shitom jong baroh kiba donkti ban pynïoh ïa ka madan ïalehkai kaba ïahap kyrdan bad kiwei kiba don ha kylleng jong ka.
La khmih lynti ba ka jingpynlong ïa ka jingïalehkai kriket ha kane ka kyrdan kan nang pynshlur shuh shuh ïa ki samla ïalehkai kriket na Garo Hills ban shim bynta ha kane ka jingïalehkai bad ki don katto-katne ngut ki nongïalehkai kiba shong ba sah ha Garo Hills kiba la jied da ki nongjied jong ka MCA na ka bynta kane ka jingïalehkai ka ban wan.
Yn pynbiang ïa ki jaka shong na ka bynta ki paidbah nongwan peitkai bad ka jingïalehkai kan sdang ha ka por 8 baje mynstep ha ka 25 tarik mynta u bnai.
Na ka liang ka MCA mynta ka sngi ka la pyllait ïa ka kynhun ïalehkai jong ka na ka bynta kane ka jingïalehkai bad ka ban sa wan ka ban long pyrshah ïa ka Vidarbha ha Nagpur ban sdang naduh ka 1 tarik u Rymphang.
Na ka bynta ka jingïalehkai ha Alotgre kan pynsah kynmaw, ki nongïalehkai na Khasi-Jaiñtia Hills ki dei ban leit mih sha madan MCA ha Polo, Shillong, ha ka 22 tarik mynta u bnai ha ka por 6 baje mynstep na ka bynta ban leit sha Tura. Kito kiba na Garo Hills ki dei ban leit beit sha Tura ha katei ka tarik ba la kdew.
Ki kyrteng jong rangïalehkai ka Jylla na ka bynta ka jingïakhun pyrshah ïa ka Bengal bad Vidarbha ki kynthup ïa u Kevin S Christopher (C), Manish Sharma (VC), Rohit Kr Yadav, Sachin Kumar (WK), Abhishek Kumar, Kush Agarwal, Gavineal J Marpna, Bipin Kr Ray, Josiah Momin, Swastic Chettri, Bharat Gurung, Gulgul M Sangma, PM Santhosh, Thunun Marak (WK) bad u Argeas Cham Cham Sangma. Kiwei pat kiba la pynap lypa (standby) ki long u Joydeepan Deb, Purav Agarwal, Avinash Rai, Banialam Mylliemngap bad u Navin K Rai.
Ki coach ki long u Neetesh Sharma (Head Coach), Synrapsing Riahtam (Assistant Coach), Emidao Dhar (Physio), Skhembor Khongbtep (Trainer) & Chuba R Marak (Manager).
