Shillong, K’lyngkot 16
Ka lympung ïalehkai basketball kaba ar sngi ba la tip kum ka Junior North East 3×3 Basketball Challenge 2025, ka la long ha ka 15 bad ka 16 tarik mynta u bnai ha Rangdajied United Performance Center, Pynthor.
Ïa kane ka jingïakob la pynlong da ka Rangdajied United Sports Development Society, ka Touchline Basketball Academy kaba la kyrshan da ka Meghalaya AIDS Control Society.
Ha kine ki ar sngi jong kane ka jingïakhun la wan ban ïashim bynta kumba 40 tylli ki kynhun ïa kaba la pynïalehkai ha ki saw tylli bynta.
Ka kynhun kaba la rah ïa ka nam lahduh ha ka Under-16 girls ka dei ka St Mary’s A bad ïa ka kyrdan ba-ar la ïoh da ka St Mary’s B. Ïa ka nam Most Valuable Player la ïohpdiang da ka Phibalari Kharmaw. Ha ka Under-16 boys la rah da ka SYM Sub Zero bad ba-ar ka Tenacious, katba ïa ka nam Most Valuable Player la ïohpdiang da u George G. Momin.
Ha ka kyrdan ïalehkai Under-19 Boys la rah nam lahduh da ka SYM JimJam bad ba-ar ka Team Aditya. Ïa ka nam Most Valuable Player la ïohpdiang da u Daryll Langstieh. Haba phai sha ka Under-23 Girls la rah nam lahduh da ka Anthonians bad ba-ar ka Khelo India, ïa ka nam Most Valuable Player la ïohpiang da ka Lynette Mylliemngap.
Ha kane ka sngi pynhap pyrda, la ïadon lang u Bah Eugeneson Lyngdoh, President ka RUFC bad u Bah Joel Marbaniang, President ka Meghalaya Basketball Association.
