Shillong, K’lyngkot 16
U Pastor S.I. Ïawphñiaw uba dei u Senior Pastor KJP Synod Sepngi, ha ka Sngi Palei u la pyllait paidbah sa kawei pat ka kot ba la thoh da u Bah HT Wells Sten kaba kyrteng “U Kynjri ka Jingtim (Dkhat ïa u Kynjri jong ka)”, ha ka jingïalang kaba la long ha Conference Room ka KJP Synod Sepngi ha Mission Compound, Shillong.
Haba kren kum u kongsan ha kane ka sngi, u Pastor Ïawphñiaw u la ñiewtang ïa u synñiang ba u nongthoh u la kynshew ha ka thoh ka tar jong ka jaidbynriew, ha kaba u la ong ba kane ka kot ka long kaba ïadei eh bad kane ka juk ha kaba ki jingtim jong u bymman ki wan laiphew jait ha ki briew.
U la ïaroh ruh ïa ka rukom buh kyntien jong u nongthoh ha man la ki kot ba u thoh, da ki kyntien bad ki kyrteng kiba pynkhih ïa ki jingmut jingpyrkhat jong ki nongpule.
“Dei tang kiba wad ïa ka bor jong u Blei kiba lah ban dkhat ïa u kynjri jong ka jingtim, namar da lade phim lah”, la ong u Pastor, ha kaba u la kyntu ruh ïa ki nongpule ba kim dei ban duh ïa ka kopi jong kane ka kot kaba ïarap ïa ki longïing kiba shem bad kiba tyngkhuh ïa ka pop ka jingtim ha ka dur jong ka jingpang khyllah, jingïap aksiden bad kiwei.
U Pastor NWP Warjri uba long u symbud kongsan ha kane ka sngi, u la ïathuh ba u la ithuh ïa u nongthoh jong kane ka kot naduh ba dangrit, uba wan na ka longïing longsem kaba donburom bad kaba riewblei.
U Pastor Warjri u la ïathuh ruh ba u Bah HT Wells, ym tang ba u thoh ïa ki kot niam ba kynja mynsiem, hynrei u dei uwei na ki nongthoh ‘Columnist’ (u briew uba ju ai jingthoh ha ki kot khubor) ba tbit jong kane ka juk, u bym ju salia ban pynïeng ‘ñiuhmat ïa ki nongpule la ka dei ïa kino-kino ki phang.
Na ka liang u nongthoh jong ka kot, Bah HT Wells Sten u la ïathuh ka daw ba u la pynmih ïa kane ka kot ka long ba u ïohi ba bun bah ki briew ki ïatyngkhuh mawsiang ïa ka pop ka jingtim kaba hiar pateng na ki longshwa manshwa ha ki pateng ba lui-lui bym tip eiei ïa ka duh ka dang jong ka.
U la ïathuh ruh kumno ba u ïakynduh ha khohsiew lajong halor ka jingkhlad aksiden kali u kynum trai ha u snem 2011, bad ka jingkhlad na ka jingshah lympat bording ilektrik ka para kynsi jong u dang ha u bnai Risaw jong u snem ba la dep. U la ong ba ha kane ka kot ka don lut ha ka, kumno ban lait na u kynjri jong ka jingtim.
Ha shwa ïa katei, u Bah Wells u kren bynñiaw ba la hiar palat ka jingkwah bad ka jingdon jong ki briew ba pule kot ha kane ka por ba mynta.
