Shillong, K’lyngkot 16
U Samuel Lyngdoh Kynshi u la leit phai biang sha ka lympung ïalehkai I-League hadien ba ka Rajasthan United FC ka la shim wai na ka klob Indian Super League ka Punjab FC.
Ïa kane la pynbna da katei ka kynhun ïalehkai I-League ha ka Sngi Balang. U Samuel um shym la paw ba un ïoh ïalehkai ha kane ka samoi jong ka ISL, wat la u la long u rangïalehkai ba khlem pyndonkam ha ki saw tylli ki jingïalehkai. Kane ka long da khongpong na ka bynta uwei pat u para nongïalehkai ka Jylla u Ricky John Shabong, uba la ïoh ban ïalehkai ha baroh 14 tylli ki jingïalehkai na ka bynta ka Punjab.
Katei ka jingbym ïoh u Samuel ka dei ka daw na ka jingbym ïahap satia bad ki jingthmu jong u Panagiotis Dilmperis kum coach. Te kumta ka long kaba biang eh ïa u Samuel ba un ïoh ka lad ban ïalehkai na ka bynta ka Rajasthan, kaba don ha ka kyrdan ba hynriew ryngkat 11 poiñ na ki phra sien ïakhun.
Lah ban pynkynmaw ba ka Rajasthan ha ka jingwan ïalehkai shabar na la ïing ha kane ka nongbah, ka la shah rem haduh 0-8 kol ha ka Shillong Lajong FC. Kane ka jingleit ïasoh (loan) sha ka Rajasthan kan long haduh kaba kut jong u Jymmang.
