Shillong, K’lyngkot 16
Ka PV Sindhu kaba la khur takma arsien ha ka Olympic ka la jam sha ka quarter final, katba u Kiran George u la pyni ïa ka jingïalehkai kaba tyngeh ban pynher ïa ka lama jong ka ri ha ka jingïakhun para marwei jong ki shynrang ha ka jingïalehkai badminton jong ka India Open Super 750 kaba la long ha ka Sngi Palei ha nongbah Delhi.
Ha kane ka jingïakhun ka Sindhu ka la lah ban pynliem ïa ka nongïalehkai na Japan ka Manami Suizu bad bat ïa ka kyrdan 46 ha ka pyrthei da 21-15, 21-13, katba u Kiran u la pynliem ïa u Alex Lanier da 22-20, 21-13 ha ka jingïalehkai pre-quarterfinal.
Ka Sindhu, kaba la bat teng kum ka nongjop ha ka pyrthei, kan ïakhun pyrshah ïa ka nongïalehkai kaba la khur ïa ka takma rnong ha ka Paris Olympic ka Mariska Tunjung na Gregoria, katba u Kiran un ïakhun pyrshah ïa u nongïalehkai na China u Hong Yang Weng jong ka wat ban wan.
“Nga dang shu shim ïa ka kawei ka poiñ ha kawei ka por, khlem da pyrkhat ïa ka jingjop. Nga pyrkhat ba kata ka la ïarap ïa nga ban pynskhem ïa ka ‘set’ kaba nyngkong. Nga dang shu ïaishah,” la ong u Kiran hadien ka jingïalehkai.
“Kane ka jingjop ka long kaba bha, hynrei nga pynleit jingmut ha ka jingïalehkai kaba hadien jong nga. Ka dei ka jingpynkhlaiñ ïa ka jingshaniah kaba khraw. Ban leit sha ka jingïalehkai kan ïarap shibun. Ka dei tang ka jingtrei shitom; nga ïalehkai da ka jingsbun. Kata ka dei kaba nga pyrkhat ba ka la pynkylla ïa ka jingïalehkai jong nga.” Mynta ka sngi, ngam don ei ei ban duh, kumta nga la sei lut ka bor na lade.”
