Jowai, K’lyngkot 16
Ka Sohlawiat SC na ka kyrdan ïalehkai Upper Division bad Padu United na ka Lower Division ki la lah ban pynthikna ban jam sha ka semi final hadien ba ïoh jingjop ha ka quarter final kaba la long ha ka Sngi Palei.
Ïa kine ki lympung ïalehkai la pynïaid da ka Amlarem Sub Divisional Sports Association (ASSA) ha madan Mini Stadium Ladjaplem, Amlarem.
Ha ka jingïalehkai quarter final jong ka Upper Division, ka Sohlawiat SC ka la pynliem noh ïa ka Amlanai TC da 1-0 kol. Ïa kane ka shi kol la thep da u Kynmo Surong ha ka minit kaba 15.
Katba ha ka Lower Division, ka Padu United ka la jop da 3-1 kol ïa ka Nongshilliang Pdengshakap. Ïa ki kol jong ka Padu United la thep da u Pynshkemlang Mukhim ha ka minit kaba 19 & 40 bad ïa kawei pat la thep da u Fourstar Pohshna (58), katba ïa ka shi kol jong ka Nongshilliang Pdengshakap la thep da u Dikyrmen Swer.
Ka jingïalehkai quarter final ha ka Sngi Thohdieng ha ka kyrdan Lower Division kan long hapdeng ka Everlasting Sohkha pyrshah ïa ka Padu Mawsku ha ka por 12 baje mynsngi, katba ha ka Upper Division kan long hapdeng ka Shnongpdeng SC pyrshah ïa ka Lamin XI ha ka por 2 baje nohphai sngi.
