Imphal, Kyllalyngkot:
Ha ka jingpyntreikam kaba bteng pyrshah ïa ka jingthung syntiew Poppy beaiñ, ki nongïada aiñ jong ka Indian Union ha kine ki khyndiat sngi ba la leit ki la pynjulor ïa kumba 50 akar eiei ki jaka rep Opium beaiñ ha ki bynta ba shaphang Mihngi jong ka Manipur kiba ïasam khappud bad ka Myanmar.
Ïa kane ka jingkhynra la pynlong kum shi bynta jong ka jingïakhih jong ka sorkar Manipur kaba dang ïaid shakhmat “War On Drugs,” kaba la sdang naduh u snem 2017. Kumba 50 akar eiei ki jaka rep syntiew Poppy ki la shah pynjulor ha ka thaiñ kaba don ha ka shnong Mullam kaba hap hapoh Ukhrul distrik, jong ka Manipur, ong u Additional Superintendent of Police (SP) jong ka Ukhrul, u Ringthing Hongchui.
Ïa kane ka jingïaid lynti la pynïaid da ka kynhun ba la pynïasoh lang jong ki pulit jong ka Ukhrul distrik, ka kynhun 6 Manipur Rifles, ka tnad ba dei khmih ïa ki khlaw jong ka Ukhrul, ki shipai ka tnat Border Security Forces bad ka kynhun shipai 8 Bihar Regiment. Ïa ki kper beaiñ kiba la khreh ban ot la pynjot da kaba pyndonkam da ki tiar ot phlang, ki dieng, bad ki dawai pynïap ïa ki jingthung bym donkam.
U SP u la pynpaw ba ka jingpyrshang ban pynduhjait ïa ka jingrep poppy kan dang ïai bteng ha kine ki sngi ban wan. Haba pan jingïarap bad jingïarap na ki paidbah, u SP u la pynpaw shuh shuh ba ka jingrep ïa u syntiew Poppy ka la pynjulor jur ïa ka mariang, kaba la pynkylla ïa ki lum kiba jyrngam sha ki jaka ba sah shrah. La buh jingujor da ka ejahar na ka bynta ban pynlong ïa ka jingtohkit bniah ban lap ïa ka jingthung beaiñ ïa ki jingthung Opium, u la bynrap.
Nalor kata, ha ka 10 tarik, Kyllalyngkot, ka kynhun ba ïatreilang jong ka jylla, bad ki bor pahara jong ka sorkar kmie ha ka jingdon lang u Executive Magistrate ki la pynjot ïa ki kper Poppy kiba heh 90 akar bad thang 12 tylli ki ïing rit ha ka lum Phalee kaba hap hapoh ka Lungchong Maiphei PS, Ukhrul distrik.
