Shillong, K’lyngkot 17
Ka lympung ïalehkai jong ka 6th Meghalaya Games 2025 kaba dang ïaid shakhmat ka la wanrah shibun ki jingïalehkai kiba itynnad ha ka kynjat bol jong ka Boys Under-17 kaba la long ha madan Kiang Nangbah Football Stadium hynnin ka sngi.
Ka West Khasi Hills ka la pynliem noh ïa ka Eastern West Khasi Hills da 3-0 kol ha ka jingïa-lehkai ba nyngkong. Ha ka jingïalehkai kaba bud ka West Jaiñtia ka la jop kput haduh 9-0 kol pyrshah ïa ka South Garo Hills.
Ha ka jingïalehkai ba lai, ka South West Khasi Hills ka la jop da 8-3 kol ïa ka West Garo Hills. Bad ka jingïalehkai ba khatduh hynnin ka sngi ka long hapdeng ka East Jaiñtia Hills kaba la pynliem noh da 3-0 kol ïa ka North Garo Hills.
Kane ka lympung 6th Meghalaya Games 2025 kaba la sdang naduh ka 16 tarik u Kyllalyngkot kaba dang ïai bteng haduh ka 25 tarik u Kyllalyngkot 2025 ka don kumba 3500 ngut ki nongïashimbynta ha ki 29 tylli ki jait jingïalehkai kynthup saw tylli ki jait jingïalehkai kiba dang thymmai.
