Jowai, K’lyngkot 17
Ka Synjuk Waheh Shnong Ri-Jaiñtia (SWSRJ) ka la ai khublei kyrpang ïa ka Sorkar MDA-II halor ka jingshim rai ban pynkylla noh ïa ka ‘Meghalaya State Anthem’ da kaba kynthup lang noh ïa ka ktien ‘Pnar’ ha ki kyntien ne ‘lyrics’.
Ka Synjuk ka ai ka jingïaroh kyrpang khamtam ïa ki 7 ngut MLA ka Ri-lum Jaiñtia hapoh ka jingïalam u Symbud Myntri Rangbah ka Jylla, Bah Sniawbhalang Dhar kiba la shimkhia bha halor kane ka jingthrang jingangnud jong ki nongshong shnong ka Ri-lum Jaiñtia.
“Don ka kyntien kaba ong, haba leh ïa kano-kano ka kam babha, hap ban ai ka jingïaroh bad ban siew kylliang da ka jingbha,” la ong Bah Lipon bad kyntu ruh ïa baroh ki paidbah nongshong shnong ka Ri-lum Jaiñtia ban ym sngewthuh bakla halor ka jingdawa pynrung ïa ka ktien Pnar, kan wanrah ïa ka jingpharia jaidbynriew hapdeng u Khasi bad Jaiñtia.
Ka Synjuk ka la ai khublei kyrpang ruh ïa ki baroh sengbhalang bapher-bapher ka Ri-lum Jaiñtia bad ‘riew paidbah kiba don kajuh ka jingangnud ryngkat ka Synjuk ban pynrung ïa ka ktien Pnar ha ka jingrwai State Anthem bad ha kajuh ka por ka la kyntu ruh ïa ka EC jong ka JHADC ban buddien ïa ki dak Pnar ba la pynmih hapoh ka ‘Gazzette’ jong ka Meghalaya.
Kumba ki la shimkhia ban kynthup lang ïa ka ktien Pnar hapoh ka State Anthem, ka Synjuk ka la kyntu ruh ïa ki 7 ngut MLA ka Ri-lum Jaiñtia ban ïakren na ka bynta ki jingeh jong ki nongshong shnong khappud na ka daw ka jingkyntur pud jong ka Sorkar Assam, ban ïakren ruh halor ka jingnang kiew ki kam tuh kam thiem naduh ba sdang ka jingkhang ïa u dewïong khamtam ban wanrah ka roi ka par naduh ki surok, lynti-syngkieñ, ki skul ki kolej, ka umbam-umdih, ki jaka sumar kiba biang nalor kiwei-kiwei ki jingmyntoi jong u paidbah.
