Shillong, K’lyngkot 17
Ka jingdon ki skul ha Meghalaya ka la bun shaba palat haba ïanujor bad kiwei pat ki Jylla, ha kaba ki don ki skul ki bym don khynnah bad ki don ruh haduh 2,269 tylli ki skul kiba don khynnah tang hapoh 10 ngut ki khynnah skul.
Ki don 206 tylli ki skul ha kane ka Jylla ki bym don khynnah wat tang iwei ruh.
Ka jingbun palat ki skul kiba la don mynta la bun phew snem khamtam ka jingdon ki skul kiba kum kine kiba don khynnah tang khyndiat ngut ka la nang pynhiar ïa ka kyrdan ka Jylla ha ka pule-dangle.
La ong ba ka jingbun ki skul ha Meghalaya kam ïahap shuh bad ka jingdon ki nongshong shnong.
Kum ka nuksa, wat lada ka Tripura ka kham bun briew ban ïa ka Meghalaya, hynrei ka jingdon ki skul ha Tripura ka duna bha tang 4,929 tylli katba ha Meghalaya ki don haduh 14,582 tylli ki skul.
Lada ïanujor bad ka Kerala kaba don haduh 3.34 klur ngut (Census 2011) ki nongshong shnong, hynrei ka don tang 15,864 tylli ki skul.
Ha Himachal Pradesh, kaba kham eh bad kham don ki jaka riat ban ïa ka Meghalaya ka don tang 17,826 tylli ki skul bad ka jingdon ki nongshong shnong ka long 68.64 lak ngut. Ka Manipur ka don tang 4,617 tylli ki skul. Shuh shuh, ka Meghalaya ka don ruh bun tylli ki skul kiba ïoh jingkyrshan na ka Sorkar.
Ka daw kaba pynlong ban mih bun tylli ki skul ka dei namar la ñiew bun tylli ïa ki skul wat lada ka dei tang kawei.
