Shillong, K’lyngkot 17
Wat la hapdeng ka jingduk ka ban namar ba u lok u dei tang u nongbylla sngi bad nongrep, hynrei ka kurim kaba la tip kyrteng kum ka Kong Drona Ryngkhlem kaba dang 21 snem ka rta ka la pynpaw ka jingsngewkmen haba ka la kha synrap haduh lai ngut ki khun kynthei shisien kha.
Ka Kong Drona Ryng -khlem ka dei shnong trai na Madur, kaba ïaid lynti na Ummulong, West Jaiñtia Hills District lada wan na Shillong sha Jowai bad u lok jong ka dei uba kyrteng Bah Shibormi Langshiang 22 snem ka rta. Kane ka longïing ka la don saw ngut baroh ki khun kynthei suda bad ka khun nyngkong ka dang don tang 3 snem eiei.
Ïa kine lai ngut ki khun kynthei, ka Kong Drona ka la kha ha ka 20 tarik Nohprah 2024 ha Maternal & Child Health Hospital Jowai kaba don ha Panaliar kaba dei ka hospital ban sumar ïa ki longkmie armet bad ki khyllung khynnah bad ka la wanphai sha ïing ha ka 1 tarik Kyllalyngkot 2025.
Namar ba ki wan na ka longïing baduk, kumta kine shi kurim ki la kyrpad ïa ki bor sorkar, ‘riew pawkhmat ne ki ‘riew paidbah ban ai jingïarap khnang ba kin lah ban pyndap ïa ka ïing ka sem namar ha ka shi taïew kine lai ngut ki khyllung ki dih dud haduh lai song ha ka jinglut kaba kot T.1800.
Kane ka longïing jong ka Kong Drona ka la mad lypa ka jingeh namar ki sah satang lai ngut shipara kynthei hadien ba ka kmie bad u kpa ki la khlad noh na kane ka pyrthei mynba ki dang khynnah.
Ban tip kham bniah ïa ka jingkha khun lai ngut jong ka Kong Drona, U Nongsaiñ Hima na Shillong u la leit ban ïakynduh kyrpang ha ïingsah ha Madur ha ka jingïadonlang u lok bad ka hynmen kynthei, ka Kong Ïalamki Ryngkhlem.
Haba ïoh ban ïakren bad ka Kong Drona ka la ïathuh ba ka la don shisha ka jingïapher lada pun ne kha tang iwei khyllung bad ka la kha haduh lai ngut ki khyllung.
“Ha ka por ba nga pun ki khyllung saw bnai ha kpoh haba nga phah peit ha u doktor ha CHC Ummulong ki lyngngoh namar ka kpoh ka heh kumba la poi hynriew bnai, hynrei haba la phah ‘test’ la lap ba don lai ngut ki khun ha kpoh” ka la ïathuh.
Ka la ïathuh biang ba ka la ngeit ba ka la punkhun lai ngut ka dei hadien ba la phah peit bniah ha ki doktor ha jaka sumar ha Jowai kaba don ha Panaliar ban thiah haduh artaïew ha katei ka jaka sumar haduh ban da dep kha.
Haba ïoh ban ïakren bad u kpa jong kine ki khyllung Bah Shibormi Langshiang, u la pynpaw ka jingsngewsih namar u dei tang u nongbylla bad nongrep, nalor kata haba kha lai ngut ha ka juh ka por namar ka shitom ïa u ban bsa. Pynban ha kawei ka liang, u sngewkmen ba kine ki khun ki dei ki jingkyrkhu U Blei bad namar kata u kwah ban trei shitom shuh shuh ban pyndap ïa ka ïing ka sem.
Nalor nangta u la ïathuh ba namar u la ïoh khun kynthei saw ngut u kwah ruh ba ka lok kan kha biang sa u khun shynrang ban shngaiñ ka ïing ka sem.
Haba ïakren bad ka hynmen, Kong Ïalamki Ryngkhlem kaba ïarap ban sumar ïa kine ki khyllung, ka la ïathuh ba ha ka shi taïew kine khyllung ki ju dih dud haduh lai synduk namar shi synduk ka poi T.600. Kumta ka la kyntu ïa ki bor sorkar ne ki ‘riew pawkhmat ba kin ïarap lem khnang ba kane ka ïing kan lah ban pyndap pynbiang namar ki dei kiba wan na ka longïing baduk.
