New Delhi, Kyllalyngkot:
U Rahul Gandhi u la ïakynduh ïa ki nongpang bad ki longïing kiba don ha ki surok, ki lynti ïaid kjat bad ki surok shnong ha kylleng ka AIIMS ha Delhi.
U Rahul Gandhi, uba dei u nongïalam ka seng Congress, ha ka sngi Palei, u la ïakynduh ïa ki katto katne ngut ki nongpang bad ki bahaïing jong ki, kiba la shong rieh ha ki surok, ki lynti ïaid kjat bad ki lynti shnong sawdong jong ka AIIMS bad kynthoh ïa ka sorkar kmie bad ka sorkar Delhi, ba ki pyni ïa ka “jingbym sngewkhia” halor jong ki.
U nongïalam ka liang pyrshah ha Lok Sabha u la ïakynduh ïa ki nongpang bad ki longïing kiba don ha ki surok, ki lynti ïaid kjat bad ki lynti shnong ha kylleng ka AIIMS bad u la kylli jingkylli ïa ki jingeh bad ki jingsngewsih jong ki.
“Ka jingkit ïa ka jingpang, ka jingkhriat tasam, bad ka jingbym sngewthuh jong ka sorkar – mynta ka sngi nga la ïakynduh ïa ki nongpang bad ki bahaïing jong ki shabar jong ka AIIMS kiba la wan na jngai ban wad jingsumar,” ong u Gandhi ha ka jingthoh ha ka ktien Hindi ba u la buh ha ka rynsan Instagram.
“Ha ka lynti jong ki ban ïoh jingsumar, ki shah pynbor ban thiah ha ki surok, ki lynti ïaid kjat bad ki lynti shnong, tang ban don jingkyrmen ba kin shah sumar wat hapdeng ka jingkhriat tasam, ka jingthngan, ka jingkyrduh bad ki jingeh,” la ong u Gandhi.
“Baroh ar tylli ki sorkar, kata ka sorkar kmie bad ka sorkar Delhi ki la bakla lut ha ka ban pyndep ïa ka jingkitkhlieh jong ki na ka bynta ki paidbah,” u la ong.
