Ka jingñiah sted bad ñiah khyllew ïa ki arshaka ne ki kali khamtam ha ki surok paidbah ka ju buh jingma shi kat dei eh ym tang ïa kito kiba ñiah kali hynrei wat ïa ka jingim jong kiwei ruh. Ngi lah ban sakhi ba katba nangmih ki sngi ki por, ka rukom ñiah kali bad khamtam lei ïa ki arshaka ruh ka la nang pher shisha, namar haba peit ha lynti-syngkieñ, la bun palat kita kiba kwah ñiah bad pynbud thik kumba ñiah kito kiba ïakob ha ki lympung Formula-1, khlem da tip ne sngewthuh ba kane katno kan ktah bad pynthut ïa ka leit ka wan jong kiwei pat. Ka rukom ñiah ïa ki arshaka lei, ka la long shisha kaba ima haduh katta katta, kaba la pynsyier mynsiem shi kat dei ïa kiwei pat ki nongñiah kali.
Ngi lah ban ïohi ba ha kine ki shisngi-arsngi ki pulit jong ka East Khasi Hills ki la sdang ban peitngor bad pynlong ka jingkhynra kali khamtam ïa ki nongñiah arshaka, kiba ju mlien ban pynher ïa ki arshaka jong ki ban pynbud thik kum kita ki ‘street hawk’ khlem salia satia wat ïa la ka jong ka jingim. Ki surok bah sha ka thaiñ Sohra bad kumjuh ka surok Four Lane sha ki thaiñ Bhoi la shem ba ki la kylla pynban kum kita ki ‘race track’ ne ki lynti ïakob pynher ïa ki arshaka, haduh ba ym ithuh-ithaw shuh. La ju sakhi ba ki arshaka kiba mih da ki kynhun haba ki poi ha ki jaka kiba beit bad jrong, ki ju sngewtynnad ban pynher bad leh kynsha kumne-kumtai. Kum kine ki jingleh la ju sakhi ruh bun ki jingjia ba lam sha ka jingmynsaw bad don ki khep kiba duh noh ïa la ka jingim.
Kum kane ka jingleh jong ki pulit, la dei ruh ïa ki pulit na kiwei pat ki distrik ban shim nuksa ban leh lang kumjuh ban lah ban khanglad ïa kum kine ki nongleh ïa ki kam khyllah bad khyllew kum ki ‘stunt’, jingpynher ba khlem tip shuh ka ban lam shano, bad kiwei ki rukom pynkiew skong dalade ïalade kiba isaidmet. Kaba donkam ka long ruh ba ki kmie ki kpa bad ki bahaïing bahasem jong kiba kum kine ki nongñiah kali ne ar shaka ki dei ban da phikir bha ïa la ki jong ki khun ki kti khnang ba kin lait na ka jingmynsaw kaba lah ban jia ha kano-kano ka khyllipmat khamtam ha ki surokbah.
Ka jingñiah arshaka da ka jingkhyllew ha surok ka buh jingma ym tang ïa kiwei, hynrei wat ïa kito kiba ñiah. Kha-ma-kha, bun ki la duh ei ïa la jingim tang namar ka jingpynher sted bad ka jingbym phikir ha surokbah. Ha kajuh ka por, ka buh jingma ïa kiwei kiba ñiah da ka burom ka akor, ka long kaba ym lah satia ban pdiang. Kane ka jingleh khyllew ha surok bad ki lynti-syngkieñ kam dei kaba jia khyllah tang ha Meghalaya, hynrei wat sha kiwei ki jylla. Shisien ba la ïoh bat ïa u ‘steering’, ki bun ki sngew ba ki la don sha kawei pat ka bynta jong ka pyrthei, bad ym shuh ha surok. Ka jingpynher bad ka jingñiah da kaba ïaid kynriang ka la pynïap ïa kiba bun ngut ha India. Ki don lei kiba shisien ba la ïoh ban ñiah da ki ar shaka ne saw shaka kiba kham remdor, ym long shuh tang ban ïakren ruh. Ki sngew ba tang ba ki la don da ki kali rem, kiwei kin hap ban shu pyndem beit haba ïaid ma ki. Ki sngew ba ki la dei ma ki kita ki trai jong ka surokbah ha kaba ki lah ban leh katba ki sngewbit. Mano ba ong ba tang kiba don ha ka bor synshar ki leh katba ki mon? Ngi ïohi ba kiba shong ha ki kali remdor ki kham palat ban ïa kiwei.
Ryngkat bad ka jingñiah ar ne saw shaka da ka jingsarong bad jingkhyllew, ki don ruh kito kiba pynheh sa ki sur jingtem hapoh kali haduh ba la sngewtriem sa ban sngap. Ngim tip na kaei ka daw ki ïa pynheh sur jingtem. Ngim tharai kin dei kiba kyllut. Hangne ka poi biang sha kata kajuh ka daw bad ka dei ka jingsarong ïa kiei-kiei ki bym ler khaw hangno-hangno ruh. Ki sarong bad khyllew ïa kiei-kiei ki bym dei bad kiba wanrah pynban ïa ka jingshah tim shah tla ha kiwei. Kim pyrkhat shuh wat haba ki ïaid ha ki surok shnong ba bun ki tymmen ki kro bad ki khyllung khynnah kiba thut noh namar ka jingtem kaba sawa jam haduh ba khih sa ki jingkhang ïit jong ki ïing ki sem kiba don harud surok haba ïaid kine ki kali. Ka la dei ka por ïa ki bor shnong ba kin ïa mih paidbah ban bat ïa kiba kum kine ki kali namar ki long shisha ka jingpynthut kaba khraw ïa kiwei. Kim don hok ban pynthut khamtam ha ka por miet.
Na ka liang ki kmie ki kpa bad ki bahaïing bahasem jong kiba kum kitei kim dei ban sngewsarong ba ki khun ki kti jong ki, ki nang ban ‘stunt’ ne ban pynher sted ne ban pynheh jingtem. Ki dei ban leh eiei ha shwa ba ka aiñ kan trei borbah pyrshah ïa ki khun ki kti jong ki.
