Shillong, K’Lyngkot 19
Ka East Khasi Hills District Athletics Association (EKHDAA) ka la ai khublei kitbok ïa ki nongïalehkai ban leit shim bynta ha ka 6th Meghalaya Games, 2025, ka ban long ha madan Wahïajer, West Jaiñtia Hills naduh ka 22-24 tarik mynta u bnai.
ïa kane ka jingïalang ai khublei la pynlong ha ka sngi Thohdieng ha S.A.I, STC, Shillong, ha kaba la ïadon lang ki dkhot jong kane ka synjuk kumjuh ki bahaïing bahasem jong ki nongïalehkai. La ai jingkyrkhu kyrdoh ïa ki nongïalehkai katba ki dang pynkhreh ban mihkhmat ïa kane ka district sha katei ka lympung.
“Ngi sngewsarong haduh katta katta ïa ki nongïalehkai jong ngi bad ïa baroh ki jingtrei shitom bad ka jingaiti lut jong ki,” ong u Bah Kyrshanbok Marbaniang, General Secretary ka EKHAA. “Ngi ngeit skhem ba kin pynlong ka jingsarong ïa ka synjuk bad kumjuh ïa ka East Khasi Hills District da kaba kin wanrah nam bad burom ha kane ka lympung.
Ki nongïalehkai kiba la pyntbit khlem shongthait la bun bnai, ki la pynpaw ka jingsngewnguh halor ka jingkyrshan bad jingai mynsiem ba ki la ïoh na ki coach jong kane ka synjuk.
Ki kyrteng ki nongshim bynta ha ka U-22 Boys ki long u Donbok Shabong, Maitshaphrang Khongwir, Kyntiewsha-phrang Khongwir, Nidawan Lyngdoh, Pyrkhatbha Suchiang, Lankupar Roy Kharpuli, Clement W Kharshiing bad u Ezechiel K Basaiawmoit. Ha ka liang ki kynthei ki long ka Angelina Jackson, Juliana Lynshiang, Adelyne Myrthong, Ïaishah Biangpor Sohïong, Lucy Mary Kharsyntiew, Bethlyne G Makri bad ka Riyoka Rymbai.
Ha ka U-30 Boys ki long u Daniel L Wahlang bad u Emphius Nongrum, katba ha ka liang ki kynthei ki long ka Glorify Kurbah bad ka Balarisha Thyrniang. Ïa kane ka kynhun la ïalam da u Wickbond L Mawlong bad u Sebastian Marboh kum u Team Manager.
