Shillong, K’lyngkot 19
Ka Hynñiewtrep Integrated Territorial Organisation (HITO) ka la pynpaw ïa ka jingpyrshah halor ka jingthmu jong ka Sorkar Jylla ban ïasoi soskular (MoU) bad ka Karnataka Cooperative Society (KCS) ha ka 23 tarik mynta u bnai na bynta ki kam ri syiar bad sniang.
“Ngim banse ban pynpaw ïa ka jingpyrshah jong ngi halor kane ka jingthmu, naba ka paw ba kam don ka jingshai, ka jingïakren bad ki paidbah, bad ka jingpyrkhat ïa ka bha ka miat kaba neh slem jong ki paidbah nongshong shnong ka Jylla,” ong ki nongïalam ka seng ha ka shithi ba la phah sha u Myntri Rangbah ka Jylla, Conrad K. Sangma ha ka Sngi U Blei.
Haba pynpaw ïa ka jingsngewkhia halor kane ka bynta, ki nongïalam ki la ong ba ka rai ban ïaid shakhmat bad kane ka MoU ka long kumba la shim khlem da pynïadon bynta lang ïa ki paidbah ne pan jingmut na ki.
Ki la ong ruh ba kane ka jingbym kheiñ snep ban ïamir jingmut ka pyntlot ïa ki nongrim jong ka synshar paidbah bad ïa ki hok jong ki nongshong shnong ban ïoh jingtip bad ban ïadon bynta ha ki kam kiba ktah beit ïa ka kamai jakpoh bad ki jingdon-jingem.
“Ka long kaba sngewkhia shibun ba ïa ki kyndon jong kane ka MoU ym shym la ïakren hapoh Ïingdorbar Thawaiñ. Kum kine ki mat kiba kongsan ki dawa ïa ka jingpeit bniah, ka jingïatai, bad ka jingïasngewthuh jingmut ban pyntikna ïa ka jingkitkhlieh bad ka jinglong hok ha ka jingsynshar,” ki la ong.
Ha kajuh ka por, ka seng ka la ong ruh ba ka jingbym don jingshai haba ïadei bad kane ka jingïateh ka buh jingkylli halor ki jingthmu jong ka Sorkar naba ki nongshong shnong ka Jylla ki don hok ban ïoh jingtip bad pyntikna ba ïa ka bha ka miat jong ki la buh halor jong ki jingmyntoi ba shabar.
“Kum u Myntri Rangbah ka Jylla, la pynkhamti ha phi ïa ka kamram kaba kyntang ban shakri ïa ki paidbah jong kane ka Jylla. Ka bor bad ka iktiar kaba phi bat ka mih na ka mon synshar paidbah jong ki paidbah, kumba la pruid dak ha ka ‘Preamble’ jong ka Riti Synshar ka India,” ki la ong.
Ka seng kumta ka kyntu jur ïa ka Sorkar ban pyrkhat biang halor kane ka jingthmu bad ban buh hakhmat ïa ka jingïakren kaba don jingmut bad ki paidbah lem bad ki nongmihkhmat jong ki.
Shuh shuh ka la ong ba lada ym lah ban pynbeit mardor ïa kine ki jingeh kiba dei hok, ka seng kan ym don lad shuh da kumwei hynrei ban lum ïa ka jingsngew jong ki paidbah bad ban mih sha surok ban pyntikna ïa ka jingpynneh-jingpynsah ïa ki hok synshar paidbah.
“Kum kine ki jingleh ym ju shim sting hynrei ki long kiba donkam ban ïada ïa ka khyndew ka shyiap, ki jingdon-jingem, bad ki briew jong ngi na ki rai kiba la shim khlem da pyrkhat bha ïa kiei ki ban mih na ki,” ong ka shithi ba la phah sha u Myntri Rangbah kaba la soi lang da u Vice-President, Bah Shaniah Nongrum bad Secretary, Bah Wanbun N. Dkhar.
