Shillong, K’lyngkot 19
Ka Shillong ha ka Sngi Saitjaiñ ka la sakhi ïa ka jingïalum lang jong ki ‘riew ieid jingtem ‘Metal’ ha kaba la ïoh ban pynlong ïa ka jingïakob tem ba la tip kum ka ‘Metal Battle Northeast Prelims’ ha ryngkat ka jingïashim bynta shit rhem jong hynriew tylli ki kynhun tem kiba la shah jied ban ïa aireng ha kane ka rynsan ïakob.
Ha kajuh ka por, kane ka rynsan ïakop kaba la pynlong kum shi bynta jong ka kylla banyngkong jong ka ‘Shillong Open Air’ ha phyllaw ka State Central Library, ka la khring ïa ki spah ngut ki ‘riew ieid jingtem ‘Metal’ na kylleng ka thaiñ.
Ka kynhun tem kaba la ïoh rah ïa ka namjop, ka ‘Air Raid Sirens’ na Mawkyrwat ka la ïoh ban bat ïa ka kyrdan ba ha khlieh duh bad mynta kan mihkhmat ïa ka Thaiñ Shatei Lam Mihngi ha ka kylla ‘India Subcontinent’ jong ka ‘Metal Battle’ ka ban long ha Bangalore ha ka 6 tarik u Rymphang, 2025.
Ka kynhun tem ka ban ïoh rah ïa ka jingjop ha ka kylla bakhatduh jong kane ka rynsan ïakob kan leit ban mihkhmat sha ka rynsan ka put ka tem jong ka pyrthei, kata ka ‘Wacken Open Air’ ha Germany – kawei na ki tamasa ba heh tam bad ba pawnam ha ka pyrthei haba phai sha ka put ka tem ‘Metal’, ka ban sa long ha ka aïom lyïur mynta u snem.
Ïa kane ka rynsan ïakob la pynlong da ka Meghalaya Tourism Youth Development Society ha ryngkat ka jingïatreilang bad ka ‘T7 News’, bad ïa kane ka rynsan ïakob la kyrshan da ka ‘Bangalore Open Air’ bad ka ‘Aggressive Tendencies’.
