Shillong, K’lyngkot 19
U Symbud Myntri Rangbah ka Jylla, Bah Sniawbhalang Dhar uba dei ruh u MLA ka NPP na Nartiang konstitwensi u la phla ba ki don ki nong Smit haba ki wan ha ophis jong u, ki la ïathuh ba kumno u President ka VPP Bah Ardent M Basaïawmoit u leit ïalap kylleng-kylleng katba ha konstitwensi la jong um ju peit.
Ïa kine ki kyntien u Bah Sniawbha-lang Dhar u la pynpaw ha ka por ba u plie paidbah ïa ka Community Hall jong ka shnong Nongkhroh, West Jaiñtia Hills ha ka jingdonlang u MDC ka thaiñ u Bah Jesse Suiam myn ha ka 17 tarik Kyllalyngkot.
Haba ai jingkren ha kane ka jingïalang, u Bah Sniawbhalang u la ong wat ym shah pynbiej ha kiwei ki seng saiñpyrthei, kiba wan tang ha ka por ilekshon, khamtam ki seng thymmai, namar ki paidbah ruh ki ngop lang, hynrei kynmaw kano-kano ka tiar kaba thymmai kam ju neh slem, ka ju jah kloi namar kane ka VPP kaba shu pynkhih ïa ka jingmut jingpyrkhat jong ki briew.
U la ong ba kane ka ilekshon MDC kim dei shuh ban bakla kumba ki bakla ha ka ilekshon MP Lok Sabha.
