Jowai, K’lyngkot 19
U Ma Khroo Lamsalanki Pariat, ba shong ba sah ha Tympang Iawmusiang, Jowai u la pynbna ïa ka rai ban ïakhun ïa ka ilekshon MDC sha ka JHADC ka ban long ha ka 21 tarik Rymphang.
U Ma Khroo L Pariat u la pyntip ba un mih madan ban ïakhun kum u kyrtong shimet na ka 17-Jowai North Konstitwensi.
Ki mat bad thong jong u, ka long ban pynkhlaiñ ïa ka riti dustur, ban ïada ïa ka khyndew ka shyiap, ki um ki wah, ban kyntiew ïa ka ïoh ka kot, ka pule puthi nalor kiwei kiwei.
Wat la u la ïoh jingtyrwa na ki seng saiñ pyrthei kum ka Congress bad BJP ban ïakhun da ki tiket jong ki, hynrei u Ma Khroo u la kyntait bad rai ban ïakhun kum u kyrtong shimet.
U la kyntu ïa ki paidbah nongshong shnong jong ka Jowai North bad Jaiñtia Hills ba ki dei ban shim ïa ka rai kaba bniah haba ki jied ïa ki nongmihkhmat jong ki, da kaba ban jur ïa ka jingdonkam ban jied ïa ki briew kiba buh hakhmat eh ïa ka bha ka miat jong ka imlang sahlang bad ka jaidbynriew.
Lah ban kdew ba u Ma Khroo L Pariat u don bynta ha ki kam shakri paidbah bad u dei u President jong ka Khooid yaka wah Myntdu, kumjuh u nongaibuit ka Muster Roll, ki nongbylla sngi, bad ki nongshet ja Mid-Day Meal ha ki skul bapher bapher bad u President ki Waheh Kur Ri Jaiñtia, nalor kiwei ki kam shakri ha ka imlang sahlang.
