Shillong, K’lyngkot 20
U Myntri Rangbah ka Jylla, Conrad K. Sangma ha ka Lah Sngi U Blei u la pynsngew biang ïa ka kular jong ka Sorkar ban buh hakhmat eh ïa ki samla ka Jylla haba phai sha ki kam ba ïadei bad ka jingshim rai (jong ka).
Haba kren ha ka jingïalang pynkup burom – ‘Meghalaya IT Awards’, ha kaba la ai khusnam sha ki khynnah pule kiba la leh bha ha ka klas X bad XII da ki ‘Laptop’, u Myntri Rangbah u la ban jur halor ka jingdonkam ban pynkup bor ïa ki samla ban pynïaid shakhmat ïa ka roi ka par bad ka jingkiew jong ka Jylla.
“Ka Sorkar ka shim khia bad pynleit jingmut bha ïa ki samla jong ka Jylla jong ngi,” u la ong.
“Ki samla ki don hapdeng jong ka jingshim rai jong ngi, bad baroh kaba ngi leh, la leh da kaba buh jingmut ïa ki jingmyntoi jong phi,” u la ong.
U la ban jur ba ïa ki mat treikam bad ki prokram ka Sorkar la pynwandur ban pynbiang ïa ki jingdonkam bad ki jingangnud jong ki khun samla.
Haba kren halor ka jingpyrshang jong ka Sorkar ban kyntiew ïa ki lad ki lynti ha ki kam ïalehkai, u la ong, “Ngi kwah ban kitkhia ïa ki samla don sap jong ngi, khnang ba ngi lah ban pynkhreh ïa ki ban ïakhun ha ka kyrdan jong ka ri bad ka pyrthei, kynthup ïa ka ‘Olympics’.”
“Kane ka sienjam ka dei shi bynta jong ka buit treikam ba ïar jong ka Sorkar ban kyntiew ïa ka roi ka par kaba pura bad ban pynkupbor ïa ki samla ban ïoh ïa ka sap kaba pura,” u la ban jur.
Haba pyntip sha ka jingïalang halor ka rukom treikam ‘Lifecycle Approach’ ba la shim da ka Sorkar na ka bynta ban shim rai, u la ong, “Ka jingthmu ba kongsan jong ngi ka tawiar sawdong halor ki jingdonkam jong ki kmie, ki khynnah, bad ki khun samla. Ngi buh ïa ka nongrim na ka bynta ka lawei jong ka Jylla bad ka ri jong ngi.”
“Ïa ki polisi bad ki prokram jong ngi la shna pynwandur da ka rukom pyrkhat kaba pura, da kaba buh hakhmat eh ïa ka jingroi bad jingkiew baroh kawei jong ka Jylla bad ki nongshong shnong jong ka,” u la bynrap.
Haba ai khublei ïa palat 300 ngut ki samla pule kiba la leh bha jong u snem 2023-24 kiba la ïoh pdiang ïa ka khusnam ha U Soso Tham Auditorium Shillong, u la kyntu ïa ki samla pule ban long kiba bud bad kiba pynbiang ïa ka por kumjuh kiba don akor ha ka jingim.
“Ka khusnam ka dei ka jingithuh da ka Sorkar ïa ka jingjop jong phi. Kane ka long tang ka jingsdang jong ka jingïaid lynti jong phi. Ngi ngeit ba phin nang ïaleh kham bha bad pynshlur ïa kiwei pat,” u la bynrap.
