Shillong, K’lyngkot 20
U Match Commissioner ka Asian Football Confedera-tion (AFC) u Mindu Dorjee lem bad u Abhishek Yadav, Senior Manager, Club Licensing and Competitions jong ka All India Football Federation ha ka Lah Sngi U Blei ki la wan jurip ïa ka Jawaharlal Nehru Stadium kaba don ha Polo.
Kane ka jingwan jurip jong ki ka long hadien ba ka AIFF ka la tyrwa sha ka Meghalaya Football Association (MFA), ba kan pynlong ïa ki ar tylli ki jingïalehkai bar ri (international) ha ka nongbah Shillong.
Kine ar tylli ki jingïalehkai kiba ka AIFF ka la tyrwa sha ka MFA kin long ba ha ka 19 ne 20 tarik u Lber mynta ka snem ha kaba kan don shwa ka jingïalehkai paralok (international friendly match) hapdeng ka India bad ka Maldives. Hynrei kaba kham kongsan ka jingïalehkai kan dei ka jingïakhun jong ka AFC Asian Qualifying Round hapdeng ka India bad ka Bangladesh, kaba la buh ban pynlong ha ka 25 tarik jong u Lber mynta ka snem.
Ha kane ka jingwan jurip la synran lang bad ki dkhot ka Meghalaya Football Association hapoh ka jingïalam u Bah Hamletson Dohling kum u President lem bad u Chief Engineer ka State Sports Council of Meghalaya (SSCM), ha kaba u Dorjee u la lap hi da la ki jong ki khmat ïa ki katto katne ki jingduna ha katei ka stadium, ha kaba u phlang ba shisha (natural turf) ha ki bynta shapdeng jong ka madan ïalehkai u la sdang sniew, kumjuh ka jingjrong khyndiat u diengkol, ka jaka khreh ki nongïalehkai, ka jingpynïeng ïa ka giant screen bad kiwei kiwei.
Te kumta u Dorjee u la bthah ïa ki dkhot ka MFA lem bad ki bor Sorkar ba kin ïaleh ban pynbiang ïa baroh kitei ki jingduna shwa u Lber khnang ba kiei-kiei baroh ki jingthmu kin long kiba ïaid beit ïaid ryntih khlem kino-kino ki kynrum-kynram.
Lada kane ka urlong, kan long ka sien nyngkong eh ba ka Jylla kan ïoh ban pynlong ïa kane ka lympung ïalehkai bar ri mynta u snem.
