Guwahati, Kyllalyngkot:
U Myntri Rangbah ka Assam u Himanta Biswa Sarma, ha ka 16 tarik Kyllalyngkot u la mynjur ban mang pisa T.2,000 klur na ka bynta ban pyntreikam ïa ki skhim bapher bapher.
Hadien ka jingïalang jong ka kynhun Myntri, u Myntri Rangbah ka jylla u la ong, “Ha ka jingïalang jong ka kynhun Myntri, ngi la pyndep ïa ki jingbthah ban ai jingkyrshan pisa sha 27 lak ngut ki kynthei na ka kynhun Self-Help Group. Lyngba kane ka skhim, ki kynthei jong ki kynhun SHG ha Assam kin ïoh pisa T.10,000 ha ka bynta kaba nyngkong, T.25,000 ha ka bynta kaba ar ryngkat bad ka Bank bad jingïarap sorkar, bad haduh T.50,000 ha ka bynta kaba lai lyngba ki Bank.”
Nalor kane, la mang T.70 klur na ka bynta ka surok kaba pynïasoh ïa ka Balimukh sha Sildubi lyngba ka Bhuragaon katba T.55 klur la mynjur na ka bynta ka lynti pyntuid um na ka bynta ka Morigaon Town.
Shwa ïa kane, ka sorkar Assam ka la ïasoi ïa ki MoU bad ka State Bank of India (SBI) bad ka Union Bank of India (UBI) ban ai ïa ki jingmyntoi Insurance sha ki nongtrei sorkar jylla.
Ha ka jingïalang jong ka kynhun Myntri ka jylla kaba la long ha North Lakhimpur, la ai bor ïa ka tnad pla pisa jong ka jylla ban soi ïa ka jingïateh kular (MoU) bad ki Scheduled Commercial Bank (SCB) ban ai ïa ka jingïada Zero-premium Insurance sha baroh ki nongtrei ba pura ne ki nongtrei ba man ka por jong ka sorkar jylla, baroh palat saw lak ngut ki nongtrei.
Ka tnad pla tyngka shen hadien kata ka la ïakren bad baroh ki SCB ban wad ïa ki lad ki lynti kiba bha tam na ka bynta ki nongtrei.
Kum ka sienjam kaba nyngkong, ka tnad pla tyngka ka la ïasoi ïa ki MoU bad ka State Bank of India (SBI) bad ka Union Bank of India (UBI).
Hapoh kane ka jingpynbeit, ki nongtrei sorkar jylla kin ïoh ïa ki jingmyntoi ha ka dor bym dei siew ei ei kaba kynthup ïa ka Term Life Insurance kaba duna eh 10 lak tyngka (ka jingïada na ka bynta ki nongtrei ha ka jingïap kumba la dei ka por, kynthup ïa ka jingïap na ka daw ka jingpang ne ka jingjia aksiden), kaba duna eh 1 klur tyngka na ka bynta ka jingjia ïap aksiden, haduh T. 1 klur na ka bynta kiba duna dkhot met baroh shi rynïeng, haduh T.80 lak na ka bynta kiba duna dkhot met khyndiat, kaba duna eh 2 klur tyngka na ka bynta ka Air Accidental Insurance (ka jingpynbiang ïa ki nongtrei lada jia ba ïap na ka jinghap ne bthei liengsuiñ).
Nalor kata, yn ïoh ïa ka jingïada na ka bynta ka koit ka khiah ha ka dor kaba rem bha na ka bynta kito ki nongtrei kiba jied ban ïoh ïa kajuh na kine ki Bank.
Ki nongtrei ki lah ban aiti ïa ka phorm sha ka tnad ba jan tam jong ka Bank ba ki don mynta lane kano kano ka Bank ba la buh ha ka Empanel ha kaba ki pynneh ïa ki jingkheiñ tulop jong ki. Ki dei ruh ban pynthikna ba ki Account jong ki kin shah kheiñ kum ki Account tulop da kaba pynthymmai ïa ki Passbook jong ki ha ka tnad ba jan tam.
