Jowai, K’lyngkot 21
Ïa ka 6th Meghalaya Games 2025 la plie ha ka Sngi Ba-ar da u Myntri Rangbah ka Jylla, Conrad K. Sangma ha Wahïajer Stadium, Jowai ha kaba la sakhi lang da ka jingdon jong 3500 ngut ki nongïalehkai kiba la wan na 12 tylli ki district jong ka Jylla lem bad kiwei kiwei.
Ha kane ka lympung ki la don 29 tylli ki jait jingïalehkai bapher-bapher, kynthup ïa ka Roll Ball kaba long ka jingïalehkai kaba dang pynrung thymmai bad ki don kynhun 7 ngut ki nongïalehkai kiba don jingduna ha ki dkhot met (para athletes) ki ban shim bynta ha ka jingïalehkai siat suloi. Kiwei pat ki jingïalehkai tynrai kiba la pynrung ha kane ka lympung ki long ka Mawpoiñ, Rah Moo Khrah bad An’Ding Oka.
Nalor u Sangma, la ïadon lang ki Symbud Myntri Rangbah kata u Bah Prestone Tynsong bad u Sniawbhalang Dhar, u Myntri ka tnat ïalehkai Bah Shakliar Warjri, kiwei ki myntri ki long u AT Mondal, Kong Ampareen Lyngdoh, Bah Comingone Ymbon, ki nongïalam ka MSOA bad kiwei kiwei. Ha kane ka jingïalang plie la ïadon lang ruh u nongrah ktien sha India, ka Embassy jong ka Uzbekistan u Sardor Rustambaev.
Haba ai jingkren, u Conrad u la pynbna ba kane ka sorkar kaba mynta ka ju buh hakhmat eh ïa ki samla ka jylla, bad ka jingpynlong ïa kum kine ki jingïalang kan pyndonkam ïa ki sap jong ki bad kan kyntiew ïa ka sap jong ki kum ki briew shimet.
“Ki samla ki dei ka bynta kaba kongsan ha ka jingthaw polisi jong ngi. Baroh ki skhim kiba ngi pyntreikam na ka bynta kane ka Meghalaya Games, bad kumjuh na ka bynta ki saw tylli ki jingïalehkai kiba la jia ha ka por ba kane ka sorkar ka dang synshar, ki long ka jingpyni ïa ka jingshimkhia jong kane ka sorkar ïa ki samla jong ngi”, la pynpaw u Myntri Rangbah.
Katba ki nongïalehkai bad palat 15000 ngut ki nongpeitkai kiba la pyndap ïa ka stadium bad ban sngap ïa u Myntri Rangbah ka Jylla, u la ïasam ïa ki jingai jingmut kiba bha, da kaba ong ba haba u briew u ïalehkai bad ïakynduh ïa ki jingshah rem, u dei ban pdiang ïa ka jingshah rem bad ban trei shitom ban nang pynjanai ïa la ki sap ba ki don.
“Ka jingïalehkai bad ka jingïa-shim bynta ha kum kine ki lympung ka dei shaphang ka jinglong ryntih, ka jingtrei shitom, ka jingpdiang ïa ka jingshah rem, ka jinghikai na kata ka jingshah rem, bad ka jingpynbha ïa la ka sap na ka bynta ban tei ïa ka jinglong jong ki,” u la bynrap.
“Ngi pynthikna ba ïa kine ki jingïalehkai yn pynlong ha ka rukom ba kyllaiñ namar ngi ngeit ba man la ka thaiñ ka don la ka jong ka bor.”
Ka jingpynlong ha man la ki jaka kan ym ai jingmyntoi tang ïa ki nongïalehkai hynrei kan ïarap ban nang kyntiew ha ka jingdon ki jaka ïalehkai kiba paka ha baroh ki distrik jong ka Jylla. “Ka dei shaphang ban wanrah ïa ki nongïalehkai jong ngi sha ki bynta bapher bapher jong ka jylla. Ngi kwah ban tei ïa ka jingïatylli hapdeng ki briew jong ngi,” u la bynrap.
U la ban jur ba ka jingrah ha baroh ki district kan long ka kabu ksiar ba kin lah ban pynlong ïa ka Meghalaya Games man la u snem.
