D H Kharkongor
Haduh kumne mynta dang lah ban ithuh ïa ka jingkham khuid jong ki shnong ki thaw, kaba kynthupnaduh ki lynti ki syngkien tad haduh ki nala, kiba baroh arliang surok. Hynrei kam dei eh namar ba dang shu dep, dang tang kumba shibnai, ka jingïapynkhuid shnong. Ka jingpynkhuid shnong kaba ha shwa jong ka Christmas bad ka New Year. Ka jingpynkhuid shnong kaba ïa shim bynta shitrhem naduh kiba dang kham khynnah tad haduh kiba la kham rangbah. Ka daw bah ka dei kane ka shuti tlang.
Nud ban ong ba tang shu sdang biang ki skul ba ki sop bad ki song jingbam -rneng, kiba har rukom, lem bad ki klong plastic jong ki jingdih rneng kin sa lyngkien biang sa shisien naduh ïa ki surok ne ki lynti syngkieñ tad haduh ïa ki nala kiba baroh arliang surok. Kan long kumta wei ba ka por leit phai ïing, hadien ba la wai skul, ka dei ruh ka por jong ka jingpynthied kyrpang ïa ki jingbam rneng bad ïa ki jingdih rneng. Nga ngeit ym da donkam ban da jer kyrteng ïa kita ki jingbam rneng bad ki jingdih rneng. Kumta ynda haba leit phai ïing ki ïaid artat artat ha ryngkat ka bam artat artat bad ruh suki jai. Kynjai naduh ki khynnah skul tad haduh ki nongwan shaw skul. Tangba ynda haba ki la dep ïa ki sop ne ïa ki song ne ïa ki klong ki sa bret pathar pat de ha lynti syngkieñ lane hapoh ki nala. Ki bapli kim suitñiew ban ap shwa na bat shwa na ka bynta ban bret ïa ki ha ki jaka kiba la mang kyrpang.
ñiuma, ka dei ka jingleh ka jong ki khynnah skul kiba dang lung naduh ka kyrta tad haduh ka bor shemphang hynrei ka dei pat ka jingleh kaba wat ki nongshaw skul ne ki nongsynran, kiba la kham heh kham san, kim sngewpher ei ei ruh em. Nud ban ong ba wat ma ki ruh ki dang leh hi kumta kumjuh, katta, ka jingbret pathar kaba naduh ïa ka plastic kwai tad haduh ïa ki song duma lem bad ka sop jympruid. La julap la jushem ba wat ki khynnah skul kiba la kham heh ka kyrta, kiba la tip bad kiba shlan ban leit hi ban wan hi, ki dang leh kumta kumjuh. Kumta tang ha kane kawei ka liang shwa ruh ba ka long lehnohei kata ka jingleit skul ne ka jingpule, ka jong ki.
Hikai ne pyni ïa u khynnah ïa ka lynti kaba u dei ban ïaid bad un nym kynriah shuh na ka, wat haduh ka jinglong tymmen ka jong u. Ka dei halor kata ka nongrim jong ka jingshisha ba ka lah bakla jur shisha ka rukom hikai, ïa ki khyllung ki khynnah. Ki nonghikai pat ruh kim im kat kum kaba ki hikai ïa kiwei. Ngim dei ban kynnoh tang ïa ki nonghikai skul naba ka ïing ka sem ka dei ka shlem jinghikai kaba nyngkong nyngshap ïa ki khyllung ki khynnah. Ki kmie ki kpa, namar kata, ki dei ki nonghikai kiba nyngkong nyngshap, ïa u khynnah. Tang na ki kmie ki kpa shwa ruh ba la lah ban ringdur ïa ka jinglong ka jong ki khun ki kti ki jong ki kumjuh kumba tang na ki khun ki kti ba la lah ban ringdur ïa ka jinglong ka jong ki kmie ki kpa ki jong ki. Ka dei ka jingshisha ba ki khyllung ki khynnah ki peit thuh bad ki bud ïa ka nuksa jong kiba la heh kiba la san.
Ha kaba ïadei bad ki khyllung ki khynnah ka jingpyni nuksa, da kiba la heh la san, ka khamkor ban ïa ka ktien ka thylliej ne ka kren ka khana, jong kiba la heh la san. Ha kaba ïadei kyrpang bad ki khyllung ki khynnah to tip ba la ki shkor kiba dang lung ki jong ki kim pat lah ban sngewthuh shai ïa kat ki jingsneng ki jingkraw, jong kiba la heh la san, pynban ki khmat ki jong ki te ki lah ïohi shynna, kat ban ithuh ruh shaikdar, ïa kat ki nuksa ba la pyni da kiba la heh la san. Ki khyllung ki khynnah ki bud ïa ka nuksa jong kiba la heh la san. Ki bapli ki khyllung khynnah ki long thik kum u Ksai uba shu bud matlah kat shaba ïalam lynti u Thyrnia.
Ha kaba ïadei bad ki skul ba ka shuti tlang kan sa kut noh shen naba ka Pyrem kam slem shuh. Ka mied ka la nang kham lyngkot katta katba ka jingshai jong ka sngi ka la kham jrong. Ka suiñbneng kan sa nang kham syaid naduh mynsngi mynshai tad haduh mynmied mynïong. Mynsngi mynshai ka sngi, ha sahit bneng, kan sa nang kham ïoh bor khamtam ynda haba khuid ne shai bha kdar ka sahit bneng. ñiuma, ïa mynta ngi dang ïai wad ïa ka jingsyaid jong ka nep tad haduh ïa ka jingsyiad jong ka sngi hynrei shen-shen ngin nym lah shuh ban shah ïa ka jingkhlaiñ bor ka jong ka. Namar ka jingsyiad ba ngin nym ïoh daw shuh ba ngin khie khamsngi. Ngin sa hap ban khie noh kham step. Namar ka jingsyaid jong ka suiñbneng ba ngin sa hap ruh ban kham smat kham sting. Ngin sa hap namar kata ban siew spah hok ïa ka por kaba kordor. Ka por kaba ngim dei ban pynleh nohei. Ithuh shai ba wat haduh ki sim ki doh lem bad ki mrad ki mreng ki ïa angnud ba ka suiñbneng kansyaid noh. Te kumta ngin ïa kyrmen ba nangne sha khmat ka suiñbneng kan sa nang kham syaid. Ngin kyrmen ruh de ïa u slap bniup-bniup uba tang shipor, uba tang kat ban tngen ka khyndew. U slap u ban pynduna shipor ïa u pum-pum.
