Shillong, K’lyngkot 21
Shim bynta ban rakhe ïa ka lyngkhuh jingïoh ïa ka jylla ba pura kaba 53, ka shlem treikam u District Sports Officer ka Ri Bhoi ryngkat ka jingïatreilang bad ka ophis u Deputy Commissioner ha ka sngi Ba-ar ki la pynlong ïa ka jingïakop mareh ba la tip kum ka Meghalaya Day Run.
Ïa kane ka jingmareh kaba 7 km la kaweh lama da u Deputy Commissioner, Abhilash Baranwal, ha kaba la sakhi ïa ka jingïashim bynta da ki nongmareh na ki nongshong shnong katei ka thaiñ ha la ki jong ki rta.
Ïa ka nam nongjop ha ka liang ki shynrang la rah da u Monas Bongrung na Pahamduma hadien ba u la lah ban pyndep ha ki 24:05 sekhon, ïa ka kyrdan ba-ar la ïoh da u Robinwell Kharbudnah na Umsaitsning uba la pyndep ha ki 25:01 sekhon bad balai da u Piku Nath na Mawroh ha ki 25:11 sekhon.
Ha ka liang ki kynthei la rah da ka Sildaris Makri na Pahambir hadien ba ka la lah ban pyndep ha ki 32:38 sekhon, ba-ar ka Alisha Syngkli na Nongkhrah hadien ba ka la pyndep ha ki 33:04 sekhon bad balai ka Shimtimon Lyngdoh na Mawryngkang ha ki 35:12 sekhon.
Ïa ka nam nongmareh ba la kham rangbah tam ki long u Pel Bey na Pahampdem bad ka Kong Snora Rani na Nongjri. La sam ïa ki khusnam sha baroh ki nongjop ha District Library kaba don ha Nongpoh.
