Kohima, Kyllalyngkot:
Ki la don kumba 15 ngut ki nongïalam jong ka National People’s Party (NPP) Nagaland unit, ba kynthup ïa u Vice President jong ka seng, ha ka 20 tarik, Kyllalyngkot, ki la leit ban pynïasoh sha ka Congress.
U President ka Nagaland Pradesh Congress Committee (NPCC) uba dei ruh u MP jong ka Lok Sabha, u S Supongmeren Jamir u la pynbna ïa kane ka jingpynïasoh jong kine ki dkhot ha ka jingïalang bad ki nongthoh khubor kaba la long ha Congress Bhavan, ha Kohima.
U President ba mynta jong ka NPCC u Khriedi Theunuo u la pdiang sngewbha ïa ki dkhot ba thymmai sha ka kynhun jong ka seng.
U Jamir u la pynpaw ïa ka jingsngewkmen halor ka jingpynrung ïa ki nongïalam ka NPP, da kaba pynpaw ba ka rai jong ki ban ïasoh bad ka Congress ka dei ka “jingkylla” ïa ka seng ha ka jylla.
U la ong ba ka Congress da ka jing-angnud kaba skhem ban shakri ïa ki paidbah, mynta ka la pynkhreh ban ïaid shakhmat da ka jingkyrshan jong kine ki nongïalam kiba dang samla bad kiba shlur, kiba la pynpaw ïa ka jing-angnud jong ki ban noh synñiang sha ki riewlum bad ban trei na ka bynta ka bha ka miat jong ki paidbah ka Nagaland.
U Theunuo u la batai ïa katei ka sienjam kum ka “sienjam kaba khraw” na ka bynta ka Congress ha Nagaland, da kaba kdew ba ka rai jong ki nongïalam ka NPP ban pynïasoh ka pynkhlaiñ ïa ka seng bad ka ïahap bad ka jingthmu jong ka na ka bynta ka lawei.
Napdeng kine kiba la pynïasoh sha ka Congress ki long u Vice-President ka NPP Nagaland, u Bitong Sangtam, bad u General Secretary (Organisation) ka NPP u L Hiketo Shohe.
U Sangtam u la ban jur ba ka rai jong ki kam dei namar ka jingbym sngewhun ïa ka NPP, hynrei ka dei namar ba ki wad ïa ka jingroi ha ka saiñ pyrthei bad ki lad ki lynti ban shakri kham bha. U la pynpaw ïa ka jingkyrmen ïa ka lawei jong ka Congress bad ka jingangnud jong u ban trei shitom na ka bynta ka jingjop jong ka seng.
U Shohe u la ong ba ki ngeit ha ka jingthmu bad ka akor jong ka Congress bad ki sngew ba ka party ka tyrwa ïa ka rynsan kaba kham bha ïa ki nongïalam samla kum ma ki ban kiew bad ban noh synñiang sha ka roi ka par jong ka Nagaland.
Kiwei pat ki heh jong ka NPP kiba la pynïasoh sha ka Congress ki long, u Bipin Kumar Sha, Secretary, u Akito Chishi, Secretary, u Khekai Zhimo, u nongthoh khubor sha ka GS Org, ka Illina Shohe, ka Mahila State Executive Member, u Toli S Achumi, u kyrtong Ex-DMC, u Heto Achumi, Vice-President ka seng, u Jaser Meru, u nongthoh khubor ba kongsan (Org) jong ka seng, u Justin Lotha, u GS Admin NPYF, u Akahito Chishi, u secretary (Org.) NPYF, u Kavito Swu, u secretary admin.U Amento Kiba, u secretary ka NPYF, u Imtimeren Imchen u dkhot, ka NPYF bad ka Sarah Zhimo.
