
Shillong, K’lyngkot 21
Ka Bharatiya Janata Party (BJP) Meghalaya Pradesh, ka la pynbna ïa ka thup kyrteng ba nyngkong jong ki kyrtong ban ïakhun ïa ka ilekshon MDC sha Khasi Hills Autonomous District Council (KHADC) bad Jaiñtia Hills Autonomous District Council.
Ki kyrtong ba ka BJP ka la pynbna baroh ki long 17 ngut, ba kynthup 14 ngut ki ban aireng na ki konstitwensi sha KHADC, katba 3 ngut pat ki ban aireng na ki konstitwensi sha JHADC.
Haba kren sha ki lad pathai khubor, u General Secretary ka BJP Bah Wankitbok Pohshna u la ong ba kane ka dei ka sien ba nyngkong ba ka seng ka la sei bun ngut ki kyrtong ban ïakhun ha ka ilekshon sha ki district council.
“Nga thikna ba ka jingïashimbynta jong ngi kan ïarap naba ka party kan lah ban nohsynñiang ha ka ban pynkhlaiñ ïa ka nongrim jong ki district council”, u la ong.
Na ka liang une u Nongïalam ka BJP u la ong ruh ba ka seng kan sa pynbna biang ïa ka thup kaba ar jong ki kyrtong hapoh jong ka 27 tarik mynta u Kyllalyngkot.
Haba kylli, u Bah Pohshna u la ong ba ki don bun ki konstitwensi kiba ka seng ka don jingkyrmen ban jop.
Haba kylli halor ka jingkynnoh pyndonkam bakla ïa ka pisa da ki kyrtong ha ki ilekshon ba la dep, u General Secretary ka BJP u la ong ba um lah ban kynthoh ïa kaei kaba bakla ha ki ilekshon ba la leit, hynrei kum ka seng kan sa pynthikna ba ki kyrtong kiba la pynbna ha kane ka kynti kin leit sha madan bad rah ïa ka khubor jong ka BJP.
Ki kyrtong ba ka BJP ka la pynbna sha KHADC ki long, u Himanta Timung na Jirang, Manin Raja na Nongpoh, Hopingstone Marsharing na Mawhati, Brightstarfield Khongwir na Umsning, Councellor Mukhim na Mawkynrew, Elvisstar Kharbudon na Langkyrdem-Laitkroh, Ebren Khongthah na Nongskhen, Fairlock D Ryngksai na Nongthymmai, Kynsaibor Lyngdoh na Malki-Laitumkhrah, kong Daniella Nonglait na Mawlai, Lewis Janong Suting na Langrin, Dimandar Lyngdoh na Nongstoin, Dominic Wahlang na Rambrai-Jyrngam bad Roland Mawsor na Mawshynrut konstitwensi.
Katba lai ngut ki kyrtong ba la sei sha JHADC ki long, u Heimonmitre Phawa na Jowai South, Manbha Lyngdoh na Muthlong-Sohkymphor, bad u Shanbor Rymbai na Musniang Rngad.