Jowai, K’lyngkot 21
Ka Amlarem SC ka la buh jaka ïalade sha ka final hadien ba ka la lah ban pynliem da 2-1 kol ïa ka Seinbhalang Shkentalang ha ka semi final ba nyngkong jong ka Super Division Football ba la pynïaid da ka Amlarem Sub-Divisional Sports Association (ASSA) ha ka Sngi Ba-ar ha madan Ladjaplem, Amlarem.
Kane ka jingïakhun ka la long kaba ïakhaid bha, hynrei ka Amlarem ka la ïoh ban thep ar kol ha ka kylla miet lyngba u Tiplang Rasmut (69) bad u Wanki Pohthmi (75). Katba ka Seinbhalang Shkentalang ka la lah ban pynphai kylla lyngba u Damehi Surong (80).
Wat la ka Seinbhalang ka la mad ïa ka jingshah rem, hynrei ka lad ka dang plie ban ïoh rung sha ka final ha kaba kan pynkhreh ban ïakhun ïa ka semi final ba ar pyrshah ïa ka YC Pdengkarong ha ka 23 tarik.
Haba phai sha ka Upper Division, ka Sohlawiat ka la jop haduh 5-1 kol ïa ka Amkoi SC ha ka semi final ban buh jaka ïalade sha ka final. Ha lyndet jong kane ka nam jop ba bun kol jong ka Sohlawiat ka la wan lyngba ka hat-trick u Fullme Khongjong (8, 11 & 31), kumjuh u Meker O Buam (38) bad u Kynmo Surong (41). Katba ïa ka shi kol jong ka Amkoi la thep da u Niltam Pohktai (64).
