Nongstoiñ, K’lyngkot 21
Ka New Nongstoiñ Sports & Cultural Club (NNSCC) kan sa sdang plie pyrda noh ïa ka lympung ïalehkai phutbol kaba heh duh hapoh ka sor Nongstoiñ ïa kaba la tip kum ka Open To All Knockout Football Tournament 2024-25 ha kaba ka kynhun ïalehkai jong ka Amhynjong SSCO West Khasi Hills kan ïakhun pyrshah ïa ka Kynshi United FC.
U Bah G. Syiemlieh, President ka NNSSCC u la ong ba ïa kane ka lympung yn plie pyrda ha ka 31 tarik mynta u bnai ka ban sdang ha ka por 1.40 nohphai sngi ha madan New Nongstoiñ.
Shuh shuh, u Bah Syiemlieh u la pyntip ruh ba kumba long mynta ki don kumba 16 tylli ki kynhun na kylleng ki jaka jong ka Jylla kin wan ban ïashim bynta kynthup ruh ïa ki kynhun ïalehkai ba kham paw ka nongbah Shillong kum ka Shillong Lajong FC, bad kiwei kiwei.
U la ong ruh ba ka khusnam ha kane ka lympung ka long da ka pisa bad haba kheiñ lang kan long T. 8 lak tyngka. Kumta na ka liang ka NNSSCC sa shisien ka khot bad wer ïa baroh ki paidbah ‘riew ïeit phutbol ba kin wan sakhi ïa katei ka jingïalehkai bad ka bai rung ka long 50 tyngka marwei.
