Itanagar, Kyllalyngkot:
U Lat jong ka jylla Arunachal Pradesh u Lt. Gen. K T Parnaik (Retd), ha ka 20 tarik, Kyllalyngkot u la bishar bniah ïa ka jingïaid shaphrang bad ka jingpyntreikam ïa ki prokram bad ki skhim pynroi bapher bapher ba la kyrshan da ka sorkar kmie bad ka sorkar jylla ha Namsai ha ka por ba u leit jngoh ïa ka distrik.
Haba ïakren bad ki heh sorkar, u Lat u la ïaroh ïa ka jingpyrshang jong ki ha kaba pynïaid ïa ki kam pynroi ha ka thaiñ bad kyntu ïa ki ban pynneh ïa ka jingïaid lynti bad ban kham pynleit jingmut ha ka jingpynroi ïa ki sap bad ka jinghikai.
U Parnaik u la pynpaw khamtam ïa ka jingdonkam ban pynkhlaiñ ïa ki jaka pule Anganwadi bad u la tyrwa ban seng ïa ki jaka pule ba kham shalor ryngkat bad ki Library ba ïaid ban kyntiew ïa ka pule puthi jong ka distrik.
Haba pynksan ïa ka jingdonkam ban thaw ïa ki samla kiba la pynkhreh na ka bynta ka lawei, u Lat u la ban jur ba dei ban pyrshang katba lah ban pynthikna ba ki samla jong ka Arunachal Pradesh kin long kiba la nang la stad, kiba don ka akor, bad kiba don ka jingthmu, kaba pynlah ïa ki ban long ki nongshong shnong bad ki nongïalam kiba don ka jingkitkhlieh.
Da kaba sngewtynnad ïa ka jinglah jong ka distrik ha ka rep ka riang bad ki bynta ba ïadei bad ka, u Parnaik u la pynpaw ba u Namsai u don ka jinglah ban mih kum ka ‘Vegetable Basket’ jong ka thaiñ Shatei-lam-Mihngi. U la pynshlur ïa ki nong-rep ban shim ïa ki rukom rep tynrai bad bapher bapher khnang ban pynkiew ar shah ïa ka ïoh ka kot jong ki.
Da kaba ithuh ïa ka jinglah ban don ki kam jngohkai pyrthei ha ka distrik, u Parnaik u la ai jingmut ïa ka bor synshar distrik ban pynleit jingmut ha kaba thaw ïa ka jinglong jingman kaba paka ha ka kam jngohkai pyrthei. Kane ka kynthup ïa ka jingpyndonkam ïa ki sap jong ki nongpynïaid bad ki nongpynïaid lynti ha ka thaiñ, bad kumjuh ruh ban ai lad ban pyni ïa ka kolshor. U la kyntu ïa ki heh sorkar ban seng ïa ki jaka jngohkai pyrthei kiba la pynïaid da ka teknoloji khnang ban nang kyntiew shuh shuh ïa ka roi ka par ha ka imlang sahlang jong ka thaiñ.
U Lat u la pynpaw ïa ka bynta kaba kongsan kaba ka jingsynshar kaba treikam ka don ha kaba pynkhih bad pyntreikam halor ka roi ka par jong ka jylla. U la ban jur ba ka jingpyntreikam hi dalade ïa ki jingtip ka lah ban don ka bynta kaba kongsan ha kaba peit bniah, bishar bniah, bad bthah ïa ki jingpyrshang, ban pynthikna ba ki jingmyntoi jong ka jingpynroi kin poi sha ki nongïoh jingmyntoi ba la thmu ha ka por kaba biang.
Ha kane ka jingleit jngoh jong u, u Lat u la ïakren ruh bad ka MLA ka Lekang ka Likha Soni, ka Deputy Commissioner C R Khampa, bad u District Planning Officer u Keshav Sharma, kiba la ïathuh ha u halor ki jingjop jong ka distrik, ki jingthmu ba dang ïaid shakhmat, bad ki jingeh kiba ïakynduh.
U Parnaik u la ïakynduh ruh ïa ki ‘Goan burah’ (ki khlieh nongïalam shnong) bad ki dkhot jong ka Panchayat, da kaba kyntu ïa ki ban noh synñiang da ka mon sngewbha sha ka jingthmu jong u Myntri Rangbahduh ka ri u Narendra Modi ban pynlong ïa ka ‘Viksit Bharat’.
