Shillong, K’lyngkot 23
Ka Khasi Jaiñtia Christian Leaders Forum (KJCLF) ka la pynpaw ïa ka jingbitar halor ka jingkynthoh jong ka kynhun niam Hindu na Assam ïa kaba la tip kum ka Kutumba Surakshya Parishad (KSP) kaba la kynnoh ba ka jingjia kaba dang shu dep jia shen ha Mawkynrew ka dei na ka daw jong ka jingbym shah niam ba la pyni da ki ‘riewngeit Khristan kiba don ha katei ka jaka.
Halor kane ka bynta, u Secretary ka KJCLF, Rev. Dr. E.H Kharkongor ha ka kyrwoh sha ki lad pathai khubor, u la ong ba ka jingkynnoh jong katei ka kynhun ki Hindu kam dei kaba shisha hynrei la ïohi ba ka la don ka jingïashah bad ka jingplie lynti ïa ka Rama Krishna Mission ha baroh shilynter ka jingpyrshang jong ka ban sdang ïa ka skul ha ka thaiñ.
U la ong ba katkum na ki khubor bad ki dur ba la ring da ki lad pathai khubor ym don ka Balang ne ka seng Khristan kaba la sdang ïa katei ka jingkulmar hynrei ki dei ki nongshong shnong jong kito ki jaka kiba la ïadon bynta ha ki jingïakren kiba ïadei bad ki mat kiba ktah ïa ki.
“Ka KSP kam don hok ne nongrim ban pynpaw ïa ki jingkynnoh bad ong ba ki Khristan kim lah shah ha kaba ïadei bad ki kam niam khamtam eh kaba long pyrshah ïa ka jaidbynriew Khristan ha ka Jylla jong ngi”, ong u Rev. Kharkongor.
U la ong ba kane ka jingkynnoh ka pynpaw shai ba ka kynhun niam Hindu ka kwah ban thaw ïa ka jingpynkhihwin bad pynmeh ïa ka ding jong ka jinglong tynrai bad ka jingshah kyntait ha ka ri jong ngi kaba bun jait bad kaba khlem niam.
U la ong ba kane ka pynpaw ba ka jingthmu jong ka KSP ka long ban leh kum ki kam lehnoh ha ka jinglong ha kaba la ïohi ruh ha ka jingbyrngem jong ka kaba dang shen ïa ka Sorkar Meghalaya ban pakhang surok halor ki mat kiba ïadei bad ka Krem Mawjymbuiñ.
“Ka long kaba stad namarkata ba ki bor synshar kin shimkhia ha ka por kaba biang halor kine ki jait seng khnang ban khanglad ïa ki kam leh beiñ ïa ka jaidbynriew bad ka niam ha ka Jylla jong ngi”, ong u Rev. Kharkongor.
U la ong ba kum ki nongïalam jong ka Christian Leaders Forum ka kitbok-kitrwiang ba ka jingsuk kan long ha Mawkynrew bad ba ïa kane ka mat yn lah ban pynbeit kham kloi katba lah khnang ban kyntiew ïa ka jingnang jingstad bad ka jingïadei para bynriew hapdeng ki jaidbynriew bapher-bapher ha ka ri jong ngi.
