Kloi ka Sorkar ban ïakren bad ki seng ba sngewkhia ïa ka rai thied jaka

"Ngim dei kata ka Sorkar ka ban ong em ba ngi lah dep rai bad ngin ïaid beit shakhmat, ban ym ïakren shuh badno-badno ruh.

Shillong, K’lyngkot 23

U Myntri Rangbah ka Jylla, Conrad K Sangma, u la pynpaw ba ka Sorkar ka long kaba kloi ban ïakren bad ki kynhun bapher-bapher halor ki jingsngewkhia jong ki ïa ka rai ka Sorkar ban thied bad pynlang jaka (land bank) na ka bynta ban kyntiew ïa ka kam kynshew kam hapoh Meghalaya.

Haba kynthoh halor ka jingdawa ki sengbhalang ban pynsangeh ïa ka jingthmu ban thied bad pynlang jaka, u Conrad u la ong ba u long uba kloi ban ïakren ha kano-kano ka por.

“Ngim dei kata ka Sorkar ka ban ong em ba ngi lah dep rai bad ngin ïaid beit shakhmat, ban ym ïakren shuh badno-badno ruh. Ngi long kiba kloi ban ïakren ïano-ïano ruh kiba kwah ban ïakren. Kiba don ka jingsngewkhia, sngewbha wan shakhmat, ngi long kiba kloi ban pynshai”, u la ong.

Haba ban jur ïa ka jingkongsan ban sngewthuh ïa ki ar bynta halor kane ka kam, u Conrad u la ong ba ka bynta kaba nyngkong, ki ‘land bank’ ki dei kiba la don naduh ki snem ba la leit noh, kam dei shuh kaba dang thymmai kaba kane ka Sorkar ka leh. U la ong ba ki Sorkar ba la leit ki la leh ruh ïa kane bad kane ka Sorkar ka shu bteng ïa kaba la leh.

U la ong ka bynta ba ar ka long ka jingkiew ka ïoh ka kot bad ka jingpynbun ki lad ïoh kam ïoh jam, bad bynrap ba ki ‘land bank’ ki dei kiba hap don namar khlem ki ‘land bank’ ym lah ban ïohi ïa ka jingkiew ka ïoh ka kot.

“Ban pynbiang tarajur ïa baroh ar tylli ki bynta ka long kaba kongsan, ngin pynthikna ba ngin pynbiang tarajur ïa ki jingpynsngew jong ki paidbah, hynrei ban khmih ruh ïa ka jingkiew ka ïoh ka kot ka Jylla”.

U Myntri Rangbah u la pynpaw ruh ba ki ‘land bank’ ki dei kiba kongsan namar khlem ma ki ym lah ban kiew. Shuh shuh u la ong ba ka Sorkar ka hap ban thied ïa ki jaka bad hadien ba ka la dep kan ai wai pat bun sien ha kaba ka jingai wai kan long ïa ki nongkynshew kam ki ba wan shakhmat.

“Kum ka Sorkar Jylla lada phi phai sha ka jingpynkha ïa ka ïoh kam ïoh jam, lada phi phai sha ka jingkiew ka ïoh ka kot, kan ym jia satia khlem ka jingwan kynshew kam ki riewshimet. Kumta, khnang ban pynsuk ïa ki kam ki jam ba kin wan ki nongseng kam shimet, ngi donkam ïa ki ‘land bank’, ngi donkam ban pynsuk ïa ki ban wan kynshew kam ha ka Jylla jong ngi”, u la ong.

Haba kubur halor ka jingsngewkhia ïa kane ka rai jong ka Sorkar, u Conrad u la ong ba ki lah ban don ki jingsngewkhia, hynrei ka Sorkar ka long kaba kloi ban ïakren bad leh eiei ïa kine ki jingsngewkhia, da kaba pynpaw ruh ba haba phai sha ka nongrim treikam, lyngba kine ki ‘land bank’ mynta ka Jylla ka la ïohi ïa ka jingkiew bha ha ka ïoh ka kot.

“Ka long kaba donkam ban kiew ka ïoh ka kot jong ka Jylla bad hooid, ki jingsngewkhia ki don beit kum ha kine ki khyndiat taïew ba la leit, ki don ki jingsngewkhia ba kan ktah ïa ka Land Transfer Act namar ka Investment Promotion Policy kaba ngi thaw. Ngi la leh eiei halor kane ka jingsngewkhia bad ngi la batai ïa ki paidbah kumno ka polisi jong ngi kan ym ktah ïa kane ka bynta”, la ong u Myntri Rangbah.