Shillong, K’lyngkot 23
U Working President ka Meghalaya Pradesh Congress Committee (MPCC), Bah Pynshngaiñ N Syiem u la ong ba ki paidbah ki dei ban long kiba husiar bha haba jied ïa ki nongmihkhmat sha District Council, lym kumta lah ban poi pynban sha khlaw lada bakla.
U Bah Pynshngaiñ u la pynpaw ïa kane haba kren ha ka jingïalang jong ka Congress kaba la pynlong ha ka shnong Marbisu na ka bynta ban pdiang ïa ki nongïalam na kiwei ki seng saiñpyrthei kiba la wan ban kyrshan ïa u kyrtong ka seng u Bah George C Sun.
U Bah Pynshngaiñ u la ong ba ka long kaba donkam bha ban jied ïa ki MDC kiba tbit bad kiba shemphang ha ka rukom treikam namarba ka District Council ka dei kaba kren shaphang ka jur ka jait, ka khyndew ka shyiap bad ka ïit ka hima ym kum ha Assembly kaba ïakren ïa ki kam pynroi.
“Ngi donkam ban jied bad ïoh ïa ki nongmihkhmat kiba tip shaphang ka Supreme Court, ka District Council bad ruh ïa ka Sixth Schedule, namar lada ïoh da ki nongmihkhmat ki bym tip ne kiba tlot, tang katta ngi la poi sha khlaw, ha kaba ngin nym lah ban ïada ne leh eiei na ka bynta ka ri bad ka jaidbynriew. Ha u snem 2014 bnai Nohprah la mih ka hukum ba ki Nongïalam shnong kin nym lah shuh ban ai syrnod nongshong shnong. Kumta lada ïoh MDC da kiba tlot la kut. Hynrei ngi la leit sha Supreme Court bad tang ha ka shisien leit la long kam, ha kaba la pynmih ka hukum ba yn nym lah ban khang ïa ki Rangbah Shnong katkum ki kyndon kiba la thoh ha District Council,” la ong u Bah PN Syiem.
Shuh shuh u Bah Pynshngaiñ u la ong kumba long mynta la ïohi ba ki don bun kiba la shu kynthoh shongshit ha ki rynsan ‘social media’ bad halor kane u la kyrpad ba baroh ki don ka hok ban kynthoh hynrei dei ban kynthoh ryngkat ki nongrim ba skhem khnang ba ki jingkynthoh kin long kiba tei bad kiba ai jingmut.
U la pynkynmaw ïa ka jingïakhun jong u ha ka por ba u long CEM ka KHADC ïa ka mat kaba ktah ïa ka bor bad ka iktiar jong ki Rangbah Shnong ïa kaba u la jop. Nangta, u la pynkynmaw ïa ka jingwan jong ka aiñ ka bym shah ban bat kam ar maloi kata ujuh u briew kum u MLA bad MDC. Haba kren ïa kane u la ong ba u sngew lehraiñ ban ïathuh ïa ka kyrteng jong ki briew kiba la hiar shuki pynsted tang shu mih kata ka aiñ bad u la pynkynmaw ba u ïeng marwei tad haduh ba un ïoh ïa ka jingjop ha ïingbishar.
Ha kane ka sngi, ki Nongïalam ka Congress ki la ïoh ruh ban pdiang ïa ki nongïalam bad ki dkhot jong ka United Democratic Party na Mawphlang konstitwensi hapoh ka jingïalam jong u Secretary u Bah Jefferson Kharshiïing sha ka sem Congress. Kane ka jingwan pynïasoh ka jong ki ka la nang ai-bor bad pynkhlaiñ ïa u kyrtong MDC jong ka Congress u Bah George C Sun u ban ïakhun ïa ka ilekshon MDC na Mawphlang Diengiei konstitwensi.
Ïa kine ki nongïalam ka UDP la pdiang sngewbha da u Working President ka Congress u Bah Pynshngaiñ N Syiem ha ryngkat ka jingïadonlang u President ka Congress na East Khasi Hills District u Bah Antonio War, u Bah JA Lyngdoh, MLA barim ka Mawphlang bad ruh uba la long teng u Myntri barim ka Sorkar ïa uba ki ju khot ieid kum u Bah Dip bad ha kajuh ka por u kpa jong u kyrtong nalor kiwei pat ki nongïalam.
