Shillong, K’lyngkot 24
Ka Deputy Commissioner ka East Khasi Hills District ka Kong RM Kurbah ka la pynbna ba ki kyndon pyrkhing ilekshon lane ‘Model Code of Conduct (MCC)’ kin treikam naduh ka 27 tarik u Kyllalyngkot 2025 bad ha kane ka sngi yn sa pynmih ïa ka jingpynbna na ka bynta ka ilekshon jied MDC ka ban sdang da ka jingthep kyrteng jong ki kyrtong naduh kane ka sngi.
Haba kren sha ki lad pathai khubor hadien ka jingïakynduh bad ki nong-ïalam seng saiñpyrthei mynta ka Sngi Thoh-dieng, ka Kong Kurbah ka la ong ba yn sa pynmih ïa ki hukum ki ban sa pynjari kum ka jingpyntreikam ïa ki kyndon pyrkhing ilekshon kiba kynthup ïa ka jingpyrkhing ban rah pisa palat 50 hajar tyngka shaneng, ka jingdonkam wan aiti noh shwa ïa ki tiar siat khamtam kito kiba don suloi nalor kiwei kiwei ki jingpyrkhing kiba la buh. Kito kiba treikam lajong bad kam khaïi ki hap shim jingbit na ka bynta ban rah pisa palat ïa ka T.50 hajar.
Haba pyntip ba ka East Khasi Hills District ka dei kaba don bun tam eh ki konstitwensi ha kane ka ilekshon sha KHADC, ka Kong Kurbah ka la pynbna ruh ïa ki kyrteng jong ki Returning Officer kiba dei ban pdiang ïa ki kot thep kyrteng jong ki kyrtong na ki konstitwensi bapher-bapher.
Ha kane ka ilekshon, ïa ka madan polo bad JN Stadium yn nym pyndonkam shuh hynrei yn pyndonkam noh ïa ka Inter-State Bus Terminus (IBST) kaba don ha Mawlai Mawïong naduh ka jingthep kyrteng ki kyrtong bad ka jingñiew vote khnang ban lait na ka dheng kali kaba ktah ïa ki khynnah kiba la sdang ban long skul ha kine ki sngi.
Ka DC ka la ïathuh ruh shaphang ki jingpynbit pynbiang na ka bynta ka jingthep kyrteng ki kyrtong ka ban sa sdang naduh ka 27 tarik Kyllalyngkot 2025 ha kaba, ki kyrtong na ki 10 tylli konstitwensi kin leit ban thep kyrteng ha la ki jong ki Returning Officer ki ban sa shong ha ISBT ha Mawlai Mawïong, katba ki kyrtong na ki lai tylli konstitwensi kin thep kyrteng ha DC ophis, bad ki kyrtong na ar tylli ki konstitwensi kin thep kyrteng ha Pynursla Civil Sub Division bad ar tylli ki konstiwensi ha Sohra Civil Sub Division. La batai ruh shaphang ka jingpynbit pynbiang ïa ki kor thep vote lane Electronic Voting Machine kiba la don lypa mynta ha ISBT bad yn sa pyndonkam ha kylleng ki jaka thep vote ynda la dei ka sngi thep vote ka ban long ha ka 21 tarik Rymphang, 2025.
Ha kane ka sngi la ïoh ruh ka jingbatai lyngkot ha kaba ïadei bad ka jingpyndonkam ïa ka ISBT kaba la batai da u Additional Deputy Commissioner u Bah Ronnie Wahlang.
U la batai ba ka ISBT ka dei ka jaka kaba kham kylluid bad don lypa ki jaka pynïeng kali ha kaba ki kyrtong kiba thep kyrteng ruh kin kham suk ban rung shapoh namar yn nym shah ïa ki paidbah ban wan rung lang shapoh ISBT ha ka por thep kyrteng.
