Tura, K’lyngkot 24
U MLA ka AITC na Rajabala, Dr. Mizanur Rehman Kazi u la ther tyngeh ïa kaei kaba u ong ba ka dei ka jingleh palat pud jong ka kynhun pulit Assam kaba la rung sha ka Jylla, khlem da pyntip sha ki bor pulit jong ka thaiñ shwa ban bat ïa 2 ngut ki nongkhaïi na ka bynta ban tohkit halor katto-katne ki jingsiew lyngba ka ‘Gpay’ na katto-katne ngut ki nongthied.
Katkum ki tyllong khubor ba la ïoh lum, la ïathuh ba katei ka jingjia ka la jia ha ka 22 tarik mynta u bnai ha kaba ka kynhun pulit jong ka South Salmara distrik ka la wan poi ha ka thaiñ Rajabala hadien ka jingshah tuh jong katto-katne ki ‘mobile-phone’ bad ka jingsiew pisa kaba la ïaid lyngba ka jingsiew ‘online’.
Katkum ki tyllong khubor, ka jingthied ha kaba nyngkong ka long T.2000 katba kawei pat ka long T.1700. Ka jingsiew kaba lai kaba la leh ha ka sor Phulbari ka long T.7000 na uwei u nongkhaïi trai shnong.
“Ki pulit ki la wan sha ka dukan jong nga halor ka jingthied kaba T.7000 jong uwei u nongthied. U nongthied u la thied 6 byrni u khaw na dukan bad u la siew ‘online’ lyngba ka ‘scanner’ kaba ngi don ha dukan. Kum u nongkhaïi, kam shym la don eiei kaba sngew shyrkhei naba u don ïa u ‘PIN’ jong ka ‘phone’ kaba u siew. Hynrei ki pulit Assam ki la wan sha dukan jong nga kum ban kdew ïa ka jingshisha ba nga la ïarap ha ka kam thok. Ka dei ka jingkhaïi katkum ka aiñ bad wat lada u la tuh ïa ka ‘phone’, kumno ngin tip”, la pynpaw u nongkhaïi haba la kynjoh ktien ïa u.
Une u nongkhaïi u la bynrap ba u la ïohi sa ar ngut kiwei pat ki nongkhaïi kiba don shadien jong ka kali kiba la pyntikna ba ki la shah rah ban shah tohkit halor ka jingjia kaba kum kane.
Hadien ba la kem ïa kitei ar ngut ki nongkhaïi, ki nongshong shnong ka Rajabala ki la kynjoh ktien sha la u MLA, Dr. Kazi bad pyntip sha u halor kaei kaba la jia. U Dr. Kazi uba la bitar lep hadien kane u la kynjoh ktien ïa baroh ar tylli ki bor pulit ka Meghalaya bad Assam ban pan jubab na ki.
“Kim shym la pyntip sha ki bor pulit jong ka thaiñ ïa ka jingwan rung jong ki bad kim shym la pyntip ruh halor ka jingshisha ba ki la bat ïa 2 ngut ki briew ha kum kane ka kam. Kane ka dei ka jingjia kaba shai bha jong ka jingleh palat pud jong ki pulit Assam bad kam long kaba bha na ka bynta ka lawei. Kito kiba donkti ha kane ka kam ki donkam ban jubab”, la ong u MLA.
Nalor kane, u la buh jingkylli ïa ka nongrim jong ki pulit ban bat ïa ki nongkhaïi halor ka jingsiew ‘online’ kaba la leh lyngba ki ‘scanner’ na ka bynta ban thied mar.
“Ka jingsiew ‘online’ ka dei ka rukom mynta, ym ka jingpynkylla, bad kumno u nongkhaïi un pynshisha lada ka pisa ka dei jong u briew uba thied ne em. Ym shym la don kano-kano ka jingartatien namar ki la lah ban pynshisha ïa ka jingithuh jong ki lyngba ki ‘PIN’, kumta shano ka jingleh be-aiñ ha ka jingpyntreikam. La dei ban pyndonkam ïa ka jingmut jingpyrkhat”, la pynsngew u MLA ka Rajabala.
Ïa kine ar ngut ki nongkhaïi la pyllait noh hadien ha ka por janmiet jong kajuh ka sngi hynrei ki la mad ïa ka jingshem ka bym sngewtynnad na ka bynta kaei-kaei kaba kim shym la bakla.
“La dei ban bud ïa ki kyndon treikam ha ka jaka ba ki pulit Assam kin wan rung ha kane ka rukom. Ka donkam ïa ka jingïatreilang na baroh ar tylli ki Jylla hynrei ka jingleh palat pud ka long ka bym itynnad na ka bynta baroh ar tylli ki Jylla”, la ong u Dr. Kazi.
