Ban kyntiew ïa ka kam ïalehkai aiti u Myntri ïa ki FOP Assets sha ka Shooting Association WJH

Jowai, K’lyngkot 24

U Myntri tnad ïalehkai ka Jylla, Bah Shakliar Warjri u la aiti ïa ki tiar siat (FOP assets) sha ka Shooting Associating West Jaiñtia Hills Unit kum shi bynta ban kyntiew ïa kane ka jingïalehkai.

Ïa kane ka tiar siat u Myntri u la aiti ha ka jingïalang lyngkot kaba la long ha Chilliangraij ha ka Sngi Palei 23 tarik Kyllalyngkot ha ka jingdonlang ka ADC ka Kong HML Kynta, u Additional SP Ishan Gupta, IPS, Working President MSOA Bah John F Kharshïing, Working President West Jaiñtia District Sports Association Ma EMH Passah nalor kiwei-kiwei.

U Myntri u la ong ba ka sorkar jylla ka angnud ban kyntiew ïa ki jingïalehkai bad ban bteng ïa ki jingtei ïa ki jaka ïalehkai ha kylleng ka jylla. U Bah Warjri u la pynpaw ba ka sorkar ka dang pyrshang ban pynphriang ïa ka kam ïalehkai sha baroh 12 tylli ki district jong ka jylla ban pynthikna ïa ka jingroi kaba kynthup lang bad ki lad ki lynti na ka bynta baroh.

‘Ha ka Meghalaya Games kaba san, ka sorkar ka la shim ïa ka rai kaba kongsan ban pynlong ïa ki jingïalehkai ha kylleng ki district. Kane ka jingthmu kam dei tang ba ka kyntiew ïa ka jingïalehkai hynrei ka ïarap ruh ban pynroi ïa ki skul, ki kolej bad ki jaka ïalehkai paidbah, da kaba pynthikna ba ka sorkar ka thmu ban pynthikna ba ka jingïalehkai bad ka roi ka par baroh kawei kan poi sha man la ki thliew jong ka jylla’, ong u Warjri.

Ha kane ka sngi u Myntri u la sam khusnam sha ki nongjop ha ka jingïalehkai rahnar ha Tpep pale Iungwalieh Dorbal Hall, Jowai.