Shillong, K’lyngkot 24
U General Secretary ka United Democratic Party (UDP), Dr. Jemino Mawthoh ha ka Sngi Thohdieng u la pynpaw ïa ka jingkyrmen skhem ba ka seng kan jop ha bun tylli ki konstitwensi ha kane ka ilekshon ban wan bad kan sa lamkhmat ruh ha baroh ar tylli ki Autonomous District Council (ADC) jong ka Jylla.
“Lada ngi peit ha kylleng, ka seng ka khlaiñ bha bad haba phai sha ki konstitwensi bapher-bapher, ka UDP ka la kiew khamtam ba ka ïoh ïa ki kyrtong kiba biang. Kumta lada ngi shim kyllum lang baroh, nga ïohi ba ka seng kan jop ha bun tylli ki konstitwensi (la ka dei ha KHADC ne JHADC),” ong u Dr. Mawthoh. Haba kdew ba ka ilekshon MDC ka ïapher bak-ly-bak na ka ilekshon MP, u General Secretary u la ong ba ka ilekshon MDC ka long ‘localized’ bad ki kyrtong ki ban aireng na ki konstitwensi bapher-bapher ruh ki dei kiba na ki thaiñ ba ki shong ki sah bad kiba don ka jingïadei kaba ïajan bad ki paidbah.
Haba ban biang halor ka jingnang ïoh bor jong ka seng katba nang mih ki sngi, une u nongïalam u la ong, “Ha kane ka kynti, ngi kyrmen skhem ban lamkhmat ha baroh ar tylli ki District Council.” Ha kajuh ka por, u la ong ba ka jingïalap ilekshon ka la ïaid shaid-shaid ha man la ki konstitwensi la katto-katne bnai mynta ban yn nang pynjur shuh-shuh nangne shakhmat.
Haba kylli halor ka jingmih noh jong ki nongïalam bad nongtrei ka seng ha katto-katne ki konstitwensi, u la ong, “Ka rukom long jong ka UDP ka long kaba itynnad bha – ki MLA, MDC ba jop ki neh beit ha ka seng, ym kumba long kiwei. Lada ki nongïalam kum ki MLA, MDC, District President, Secretary, ki nongkitkam ha ka CEC ki skhem bad kim khih shane-shatai, ka jingmih iwei-ar ngut – kim da dei than eh ki nongïalam ba hakhmat ne ba shitrhem (ki lah ban long tang ki nongkyrshan) jong ka seng bad kumta kan ym don jingktah namar u babun- balang hi u skhem.”
Na ka liang une u nongïalam haba ban biang ban peit kyllum ha baroh ki liang, u la ai nuksa ba ha ka jingpynbna kyrtong na bynta ka Mawkynrew konstitwensi ha ka Sngi Thohdieng, da ki hajar ngut ki la wan sha ka jingïalang ba kynthup kito kiba la wan pynïasoh na ka NPP, HSPDP nalor kiwei-kiwei bad kane ka long ka jingai mynsiem ïa ka seng.
