Shillong, K’lyngkot 24
Ka United Democratic Party (UDP) ha ka 24 tarik u Kyllalyngkot, 2025, ka la pdiang sngewbha ïa u Bah Kansing Lyngshiang bad pynbna shisyndon ïa u kum u kyrtong ban aireng ha ka ilekshon MDC sha ka Khasi Hills Autonomous District Council (KHADC) na ka 7-Mawkynrew Constituency.
Ha kane ka sngi da ki hajar ngut ki paidbah nongkyrshan jong u Bah Kansing Lynshiang kiba kynthup naduh ki rangbah, ki samla bad longkmie ki la mih shakhmat ban synran ïa u ha Umphrup ban sakhi ïa ka sngi kaba u la rung sha ka seng UDP bad kaba u la shah pynskhem kum u dkhot ba pura ka seng da u Bah Titosstarwell Chyne uba dei u nongïalam ka liang pyrshah hapoh ka KHADC bad uba dei ruh u MDC ka Sohra Constituency.
Ïa kane ka jingïalang la pynlong ha phyllaw ïingsah jong u Bah Remington Pyngrope kaba don ha Umphrup.
Ha kane ka sngi la ïadonlang Bah Jemino Mawthoh, General Secretary ka UDP, Bah Robertjune Kharjahrin, Kong Pretty Kharpyngrope, President UDP Women’s Wing, Bah Borlington Lyngshiang uba la long u nongpynïaid ïa katei ka jingïalang ha ryngkat ka jingsakhi ki paidbah nongkyrshan da ki hajar ngut.
Haba ai jingkren ha katei ka sngi, na ka liang u Bah Titosstarwell Chyne u la ong ba kum ka seng bad ki paidbah nongkyrshan kin trei shitom ban pynjop donburom ïa u Bah Kansing kum u MDC jong katei ka thaiñ bad ong ruh ba lada u ïoh jingjop na ka seng UDP, u dei ban ïaineh bad ka seng bad ban long ki nongïalam kiba shisha.
“Nga la don ha ka UDP naduh ka sngi kaba sdang ïa ka seng UDP bad haduh mynta ngam pat ju kynriah seng. Nga la jop ilekshon naduh ka snem 2008 ter-ter haduh mynta bad wat la ki la don shibun ki seng kiba la khroh ïa nga hynrei ngam ju kynran dien na ka seng. Lada ngi don ha ka bor synshar ne ha ka liang pyrshah, ngi dei ban neh ha ka nongrim”, ong u Bah Titos.
U la ong ba wat la u Bah Kansing u la mih noh na ka seng National People’s Party (NPP) bad ban rung pat mynta sha ka seng UDP hynrei kaei kaba sngewtynnad ka long ba une u rangbah u la ïaineh ha ka ban ai ïa ka jingshakri paidbah khlem sangeh.
“Kane ka dei kaba la pynlong ïa phi ki nongkyrshan ban ïaineh bad u Bah Kansing haduh mynta hynrei ki don kiba ïaleh ïa ka ilekshon ba tang shu rem ki la jah noh bad khang tala ïa ka khyrdop bad ki ju wan tang shisien san snem kum ki ‘lur dih duma”, ong u Bah Titos.
Haba ai jingkren ha katei ka sngi, na ka liang u Bah Kansing Lyngshiang, u la ong ba ha ka ilekshon MLA ha u snem 2023, ki paidbah katei ka thaiñ ki la shah ïalam bakla ha baroh ki liang kaba la pynlong ruh ïa u ban shah rem ha katei ka ilekshon.
U Bah Kansing u la ong ba ki paidbah ka thaiñ kim dei ban shah ïalam bakla hano-hano ruh da kaba bynrap ruh da kaba ong ba kito ki briew kiba ong ba ki la shah tyrwa T. 5 klur bad kim treh hynrei mynta pat ki dei kita kijuh ki briew kiba leit ban jliah kylla.
U la ong ruh ba u la dep kren bad pynshai ha ki por kiba mynshwa ban pynsngewthuh sha ki paidbah ka thaiñ hynrei ki paidbah kim pdiang ïa kata bad ha kaba khatduh, ki paidbah ki la shah ïalam bakla ha uta uba sait-khuid ba um treh ïa ka T. 5 klur.
Ha kaba ïadei bad ka jingrung jong u sha ka seng UDP, u Bah Kansing u la pynshai sha ki paidbah ba kata ka jingong ba u kyntiap na kawei ka seng sha kawei pat ka dei ba u wad ïa ka jingjop bad ïa ka kynhun kaba khlaiñ.
