Thailand, K’lyngkot:
Uwei u nong India u la shah tuh ia u jingdeng ryndang ksiar ba remdor katba u dang ïaid ha ki thaiñ jong ka rudnong kaba don hajan ka Hard Rock Hotel hapoh Pattaya. La iathuh ba ki don lai ngut ki long kynthei-shynrang kiba don bynta ha kane ka jingjia kaba la jia ha ka Sngi Nyngkong jong kane ka taiew, ha kaba utei u nong India uba la 42 snem ka rta bad uba la ju ithuh kum u Pravin Manik Tavada, uba long u trai jong kawei ka hotel, u la iathuh ba u la shah tuh ia u kynjri ksiar uba shongdor kumba 1,32,000-baht (kumba T.3,00,000 lak) hadien ba u la shah pynthut ha kitei 3 ngut ki long kynthei-shynrang kiba u iakynduh ha katei ka sngi. U Pravin u la iathuh ha ki pulit ba katba u dang ïaid lynti na katei ka jaka ryngkat bad ki paralok jong u, kynsan kitei 3 ngut kitei ki briew ki la wan ban pynsangeh ia ki bad leh mynleh ban ai ia ki jingkyrkhu. Hadien kata, kitei ki briew ki la leh mynleh ai khublei ieid da kaba kdup bad pyndei met ia uwei u nongshang kai pyrthei uba don ha katei ka jaka bad tang kumta hi u Pravin bad ki paralok ki la ialeh ban kiar noh na kitei ki briew.
Hynrei tang mar kumta hi, kitei ki briew ki la phet krad noh na katei ka jaka da kaba pynpaw ba ki sngew bitar ia ka jingshah leh kiar ha kitei kiba don ha katei ka jaka. Hynrei, haba u Pravin bad ki paralok ki la peit bha ia ki jingdon-jingem ba ki rah ha ki, ki shem pynban ba utei u jingdeng ksiar uba don kumba 40 Gram ka jingkhia, u la jah bad um don shuh.
