Shillong, K’lyngkot 24
Ki dkhot ka Meghalaya Greater Shillong Progres-sive Hawkers and Street Vendors’ Association (MGSPHSVA) ha ka Sngi Thohdieng ki la leit ban tur biang sha ophis treikam ka Shillong Municipal Board (SMB) hadien ba la kut ka jingai por ba ar sngi ïa ka Provisional Town Vending Committee (PTVC).
Hashuwa, ka seng ka la ai por ar sngi ïa ka PTVC ban khot ïa ka jingïalang ban ïakren halor ka jingthmu ban pynkynriah noh ïa ki nongdie madan na Khyndailad.
“Mynta ka sngi, kane ka jingïakhih ka long ba ngi sngewkhia ban ïohi ïa ka jingpynbna kaba mih ban pynkynriah noh ïa kine ki nongdie madan na Khyndailad sha katto-katne ki jaka kiba hajan ka Khyndailad, ym dei sha jngai,” ong ka nongtrei mon sngewbha bad dkhot ka MGSPHSVA, Kong Angela Rangad haba kren sha ki nongthoh khubor.
Ha kajuh ka por, haba pynpaw ïa ka jingbym hun halor katei ka bynta, ka la ong ba naduh kaba sdang, na ka liang jong ki, ki la pynsngew ban pyntreikam hok ïa ka aiñ kaba la batai shai ba ka dei ban don ka ‘Survey’, ‘Digital-Survey’, ‘Claims and Objections’ – ban peit thik-pa-thik ïa ki kyrteng la ki dei hok shisha ne em ki nongdie madan, kumjuh ban ai ka syrnot ‘Certificate of Vending’ sha ki.
Ka Kong Rangad ka la ong ruh ba hadien kane, ha ryngkat ki nongdie madan, ka dei ban don ka jingleit peit lang ïa ki jaka hangno ban shong bad katno ngut, khnang ban pynbeit bad ba ki kam ki jam kin shai naduh kaba sdang.
“Hynrei mynta, ka bynta banyngkong, ba-ar, ba-lai ym pat dep, ki la kynthih sha kaba saw – ka mih ka jingpynbna kaba ong ba kin pynkynriah noh. Ki ong ban pynlut T.6 klur ha MUDA, hajan State Bank – kane ka pynlong ïa ngi ban mih madan mynta ka sngi bad ngi dawa ba ka dei ban don ka jingïalang ba kyrkieh jong ka PTVC ban ïa peit biang halor kane,” ka la ong.
Kane ka nongïalam ka la ïathuh ruh ba ha kane ka sngi, na ka liang u Chairperson ka PTVC, u la rai ban pdiang ïa ka jingai jingmut bad ban khot ruh ïa ka jingïalang ha ka 5 tarik u Rymphang.
“Ha kata ka jingïalang, ngi la ong ba dei ban peit biang ba hato ka ‘Digital Survey’…namar ngi ngim hun ban shu trei hak-dak, ban shu leh tang dep ban pynpaw ïa kaei-kaei naba kan pynmih shuh ki kynrum-kynram khamtam lada ki kum leit ai syrnot ïa ki bym dei ki nongdie madan,” ka la ong.
Haba ban biang ba ka rukom treikam ka dei ban long thik-pa-thik bad kaba bniah, ka Kong Rangad ka la ong ba ha ka jingïalang ha ka 5 tarik, yn hap ban khmih bniah bha shuwa ïa kata ka Khyndailad da kaba pynshisha biang ïa ki kyrteng, nangto ban ïa ïaid lang ban peit hangno ka biang ban shong ïa ki nongdie.
“Ka jingmang ïa ka pisa ban shna ïa ki dukan kam dei kaba la rai lang ha ka PTVC…te kumno phi rai ban pynlut ïa ka pisa paidbah, phi ai kontrak shano? Ka bym lah long. Ngi kwah ba ka aiñ kan ïaid thik-pa-thik bad ba kan treikam hok khlem da leh tang dep. Lada ngim ïatreilang kan nang pynmih shuh-shuh ki jingeh,” ka la ong.
Haba kylli, ka la ong ba ka hukum kaba la pynmih ka long kaba pynmih shimet namar khlem don kano-kano ka jingïamynjur ha ka PTVC.
“Ki pynithuh ïa ka jaka pynïeng kali jong ka MUDA. Hangto ruh kano ka mala kaba kham biang, ynda buh sha khrum lehse kam biang bad kan kham biang shajrong…phin hap pyrkhat ruh ïa ki kali kin ïeng shaei,” ong ka Kong Rangad.
Nalor kane ka la bynrap, “Hajan Main Branch jong ka SBI, ngi la ïohi ki la sdang tei, hynrei ngin hap pyrkhat kino ki jait jingdie bad ki kham ïahap shano, ym dei ban shu leh thurmur.”
