Shillong, K’lyngkot 24
U Rakkam A Sangma uba dei u Myntri ka tnat Pule-Dangle ha ka Jylla, u la ïathuh ba ka tnat ka dang wad ïa ka jaka bad ka la pan ruh ïa ka jaka na ka Sorkar Jylla na ka bynta ban tei ïa ka Shillong Campus jong ka Captain Williamson Sangma State University.
Haba ïakren bad ki nongthoh khubor ha ka Sngi Thohdieng, u Rakkam u la ong ba ka Sorkar Jylla ka la dep pynbna lypa ban buh ïa ka Shillong Campus jong ka State University, bad kane ka kam mynta ka la don ha ka jingpynkhreh.
U la pyntip ba ka tnat mynta ka dang wad ïa ka jaka ban buh ïa ka Campus ba shipor ba kan lah ban ai noh ka jingshakri sha ki samla pule ka Ri-lum Khasi bad Jaiñtia.
Katkum ka jingïathuh u Myntri, ka tnat ka pyrshang ban ïoh ïa ka jaka ba don ka NIT Campus, namar ïa ka NIT la dep pynkynriah. U Rakkam u la pyntip ba ka tnat ka dang wad jaka na ka bynta ban buh ïa ka Campus ba pura ha Shillong.
“Ngi la thoh sha ka Sorkar ba kan ai jaka lem na ka tnad Pynroi Sor ban buh ïa ka campus jong ka skulbah ka Jylla ha Shillong”, u la ong. Ha kawei ka liang, haba jubab halor ka jingkynnoh ba la shu pynbor ïa ki kolej ban pynïasoh bad ka State University, u Myntri u la ong, “Ka jingkylli ba ngi shu pynbor kam mih satia”.
U la ong ba ha kano ka rukom kane ka jingkren ka la mih, hynrei wat u Myntri Rangbah ruh u la kren shai ba ym don satia ka jingpynbor ïa ki kolej ban pynïasoh bad ka skulbah jong ka Jylla.
U la ïathuh ba na ka liang jong ka Sorkar ka la thoh sha baroh ki kolej ha ka Jylla ban kyntu ba kin ïasyllok la ki sngew ïahap ne em ban pynïasoh bad ka skulbah jong ka Jylla. U Rakkam u la pynpaw ba ka jingthmu haba wanrah ïa kane ka State University ka dei eh na ka bynta ka jingsuk jong ki samla pule, namar ha ki Central University ki don katto-katne ki kyndon kiba donkam ban hap bud bad hateng-hateng ki long kiba eh ïa ki jaka pule ban pyntreikam ïa kita ki kyndon.
U la ai nuksa ïa ka jingjia haba ka Sorkar ka la hap ban thoh sha ka Sorkar Pdeng ban pyllait ïa ka Jylla na ka eksam Common University Entrance Test (CUET).
U Myntri u la ong ba kam bha satia ban shu ïai phah pyllait man ka por, pynban la hap ban wad ïa ka lad ka lynti ka ban long shirta. “Ka dei ka skulbah lajong bad ngin ïaid kat kum ki kyndon ka Jylla bad ka almanak kan ïaid hi kat kum ki kyndon ka UGC, hynrei ïa ka jingpynrung klas bad kiwei-kiwei ki jingdonkam, kin ïaid kat kum ki kyndon ka Jylla” la ong u Rakkam.
Haba kylli, u Rakkam u la pyntip ba katto-katne ki kolej ki la phah ïa ki aplikeshon ba pynpaw ïa ka jingkloi ban ïasoh, hynrei u la bynrap ba donkam ban hap bud ïa ki lynti treikam, namar ba ka dang dei kaba sdang bad kan dang shim por ban pynbit-pynbiang ïa baroh ki jingdonkam.
