Jowai, K’Lyngkot 25
Ka 6th Meghalaya Games ka la poi sha kaba kut ha ka sngi Saitjaiñ ha U Kiang Nangbah Stadium kaba ha Jowai ha kaba ka East Khasi Hills ka la bat ïa ka nam ‘Overall Champion’ da kaba khur haduh 381 tylli ki takma.
Kine ki kynthup ïa 149 tylli ki takma ksiar, 105 tylli ki takma rupa, bad 127 tylli ki takma. Ha kane ka lympung ïalehkai kaba la neh haduh shi taïew la wan shim bynta da palat 3500 ngut ki nongïalehkai ha ki 29 tylli ki jait jingïalehkai bapher bapher.
Ka West Jaiñtia Hills ka la wan ha ka kyrdan ba ar da kaba khur 108 tylli (34 ki takma ksiar, 27 tylli ki rupa bad 47 tylli ki rnong). Ka Ri-Bhoi kaba la wan ba-ar ka la khur 104 tylli (30 tylli ki takma ksiar, 35 tylli ki rupa bad 39 tylli ki rnong).
Ïa ka nam Best Athlete la ïoh da u Banshanlang Khyllait, ha kaba ka khana kaba ai mynsiem kum u nongñiah saikil ba aiti lut ha ryngkat ka ïing ka sem jong u baroh kawei ki sngewtynnad ban ñiah saikil.
U Symbud Myntri Rangbah ka Jylla u Bah Sniawbhalang Dhar kum u kongsan u la ïaroh ïa ka jinglong ryntih bad ka jingtrei shitom jong baroh kiba don bynta. “Ngi sngew sarong ban ong ba ngi la bit ban pynlong ïa ka National Games.” la ong u Bah Dhar.
U la bynrap ruh ba ka tnad ïalehkai ka la ïohi ïa ka jingkiew kaba khraw hapoh ka jingïalam ka sorkar MDA, da kaba pynkiew ïa ka mang tyngka bad ka jingpynroi ïa ki jingtei. Ka jingtei ïa ka madan ïalehkai phutbol ha Mawkhanu, kaba la buh ban long ka madan ïalehkai phutbol kaba heh tam ha India, kan pynlong ïa ka jylla Meghalaya kum ka nongbah ïalehkai phutbol jong ka ri India.
Ha kane ka jingïalehkai la iashim bynta ruh da ki hynñiew ngut ki nongïalehkai kiba duna ha ki dkhot met (para-athletes), kiba pyni ïa ka jinglah ban ïakhun bad ka jingïadon bynta lang. Ha kane ka sngi la don lang ruh u MLA ka thaiñ u Bah Wailadmiki Shylla, u Working President ka MSOA u Bah John F. Kharshiing, bad u Deputy Commis-sioner jong ka West Jaiñtia Hills District u Bah B.S Sohliya.
