Itanagar, Kyllalyngkot:
Ka Arunachal Bharatiya Janata Party (BJP) ka la pynkhreh lut ban pyntreikam ïa ka aiñ kaba ïadei bad ka jingbuh kyrpang ïa ki kynthei ha ka ilekshon Assembly ban wan ha kane ka jylla ha ka shithi ba ka thoh. Ïa kane la pyntip da u President ba dang shu jied thymmai, u Kaling Moyong.
Ka aiñ, ynda la pyntreikam, kan ailad ïa ki kynthei ban ïashim bynta ha ka jingsynshar bad kan kyntiew ïa ka bynta jong ki ha ki rukom shim rai.
U Myntri Rangbah ka jylla u Pema Khandu dang shen u la pynbna ba ka BJP kan pynïeng 20 ngut ki kyrtong kynthei ha ka jingthep vote na ka bynta ka ïingdorbar kaba 60 ngut ki dkhot ha u snem 2029.
Ka President jong ka ri ka Droupadi Murmu ha u Nailar 2023 ka la ai ïa ka jingmynjur jong ka ïa ka aiñ ban buh jaka ïa ki kynthei kaba thmu ban ai jaka 33 percent ïa ki kynthei ha ka Lok Sabha bad ha ki Assembly ha ki jylla.
Hynrei ïa kane ka aiñ, la thmu ban pyntreikam hadien ka jingkheiñ briew kaba hadien bad ka jingpynbeit pud kaba hadien – ka jingbiang sa shisien ïa ki konstitwensi jong ka Lok Sabha bad Assembly.
U Moyong u la ong ba u la shah bthah ha u Myntri Rangbah ka jylla ban pynshlur ïa ki kyrtong kynthei ban ‘mih na ka kamra shet’ bad pynkhreh ïalade ban ïakhun ïa ka ilekshon sha ka ïingdorbar thawaiñ kaba dei ban long ha u snem 2029.
“U Myntri Rangbah u la kdew shai ba wat ki kurim jong ki Myntri bad ki MLA ba mynta kin ym ïoh tiket na ka seng lada kim long kiba tbit”, la ong u Moyong. Ki kynthei jong ka jylla ki tyngshaiñ ha ki kam bapher bapher, bad ki lah ban pawnam ha ka saiñ pyrthei ruh, la ong u heh nongïalam jong ka seng ha ka jylla.
“Dei ban pynpra ïa ki jingkhang ha ka saiñ pyrthei bad ka imlang-sahlang (ba ki kynthei ki ïakynduh)”, la ong u Moyong.
Ha ka liang ka roi ka par, u la ong ba ka seng kan kyrshan ïa ka sorkar jylla ban pyntreikam ïa ki polisi bad ki prokram jong ka bad u la ban jur ïa ka jingdonkam ban leit sha ki paidbah ban pynsngewthuh shaphang ki skhim pynroi.
U la ong ba ka seng bad ka sorkar jylla ki dei ban don ka jingïatreilang kaba biang ban pynthikna ïa ka jingbha jingmiat kaba pura jong u briew uba ïeng khatduh ha u lain ne uba ap na ka bynta ki jingïoh jingmyntoi.
U Moyong uba la mihkhmat arsien kum u MLA ka Pasighat East haba pynpaw ïa ka jingsngewnguh ïa ka seng kaba la pynkhamti ha u ïa ka jingkitkhlieh kaba thymmai u la ong, “Ngan leh katba lah ban pynkhlaiñ ïa ka seng ha ki kyrdan ba hapoh da ka jingaiti lut bad ka jingïatreilang kum ka kynhun.” U la ong ba shen un sa leit sha baroh ki distrik ban pynthikna ïa ka jingïatreilang hapdeng ki nongbud jong ka seng naduh ka jylla haduh ki kyrdon jong ki Booth.
Ka BJP ka la wan ha ka bor synshar ha ka sien kaba lai ha Arunachal Pradesh ha u bnai Jylliew jong u snem ba la lah.
