
Dr. L. S. Kharlukhi
Bun ki nongïalap ha kane ka juk stad mynta ki la hap ha kajuh ka jingbakla jong u Naaman, haba ki pyrkhat ba U Blei Un neh beit bad kaei kaba ki lah dep mutdur lypa. U Naaman u la long u rangbah shiphai bakhraw jong u Syiem Assyria, hynrei uba sa ñiangthohlieh (2King 5 : 1-4). Ka Jiw ka mraw jong u ka la ïathuh ha u ba la don u nongïathuhlypa ha Israel uba lah ban pynkoit ïa u na ka ñiangthohlieh jong u. U Naaman ula leit sha u nongïathuhlypa Elisha ban ioh khiah na u ñiangthohlieh jong u. U Elisha ula ïathuh ha u ban leit sum hynñiew sin hapoh wah Jordan yn sa pynkhiah ïa u. U la kyntait ïa ka jingong jong u nongïathuhlypa U Blei. Ka jingpyrkhat ban leit ngam ha ka wah ba jngut, ka la long ka jingñiew beiñ ïa ka kyrdan jong u. U la don lypa ka jingpyrkhat ba kumno yn lah pynkhiah ïa u. U la pyrkhat ba u nongïathuhlypa un wan ban ïa kynduh ïa u bad un kaweh la ka kti halor kata ka jaka bad khot kyrpad ha U Blei jong U, te un ioh khiah. U la kwah ba jingpynkhiah ba rkhiang ïa u niangthohlieh jong u. U la bitar haba la bthah ïa u ban ngam hapoh ka wah Jordan, namar um lah ban iohi ïa ka jingïadei hapdeng ïa kaei ba la hukum ban leh bad ka jingpynkhiah ïa ka jingpang jong u. Kumno kata kan pynjem ïa ka jingpang jong u ?” “Kane ka bymlah long” la pyrkhat u Naaman. Hynrei ngi tip ba U Blei barabor ka dei, kam pher kaei u briew u pyrkhat. Ki jingmut jong U Blei, barabor ka dei, kam pher kaei u briew u pyrkhat. Ki jingmut jong U Blei, barabor ki long kham khraw bad ka jingmut u briew bad ki lynti U Blei barabor ki pher bad kham bha ban ïa ki lynti u briew (Isa 55 : 8; Jer 10 : 28).
Hadien da ka jingkyntu ki shakri jong u, u la kohnguh bad sum hynñiew sien katkum ka ktien u nongïathuhlypa, u la khuid kum ka doh u khun lung.
Ka Jingpynbaptis ka dei shi bynta na ka plan jong U Blei ban pynim ïa u briew U Blei u la hukum ïa ki synran jong u ban pynbaptis ïa kito kiba ngeit ïa ka Gospel ban p ynim (Mk. 16 : 16). Ki synran ba ïaineh jong u ki la bud ïa kane ka jingbthah ba kynja bneng (Ki kam 2 : 38). Ki briew ba mutdur ba kham khraw, stad kum u Naaman, ki la kyntait ïa ka jingpynbaptis, namar ba kim lah ban iohi ïa ka jingïadei hapdeng ka um ha ka jingbaptis bad ka jingmap ki pop. Ha ka jingpyrkhat jong ki, kumno ka um ka lah ba ksam sha trai duh jong ka dohnud briew ban pynkhuid ïa ka ? Ha ki, kane ka long ka jingbieit ba palat bad pyrshah bad ka jingstad pyrkhat jong u briew (1Kor. 18 : 20). Kaei ka jingpynngam ha ka um, kan lah ban leh ei ei bad ka jingdonkam ba kynja mynsiem jong u briew ? U Paul u pynkyndit ïa ngi ba ngim dei ban long kiba “Sngewsameng” ba tharai “stad ïalade” (Rom. 11 : 20, 25). U la ong “hynrei ha u briew me me long uei ba me ïasaid pyrshah ïa U Blei ?” (Rom. 9 : 20).
“Ka jingpynbaptis ka pynim ïa ngi mynta.”
U apostol Petros, ha ka shithi jong u, u la hikai shai ba ka jingpynbaptis ka pynim ïa ngi.” Tang kito kiba matlah da ka mynsiem sngewmeng bad mutdur lypa kim lah ban iohi ïa ka jingshisha jong kane ka dkhot, “Kaba ha ka jingpynshisha jong ka, kata ka jingpynbaptis ka pynim ïa ngi mynta ruh (ym kaba buh noh ïa ka jingtngit ka doh, hynrei ka jingwad ka jingïatiplem babha sha U Blei), da ka jingpynmih pat ïa U Jisu Khrist.” (I Pet. 3 : 21).
Kane ka dkhot ka kren shai ba ka jingpynbaptis ka pynim ïa ngi. U Petros u batai ba ka jingpynbaptis um kam dei “Ka jingbuh noh ïa ka jingtngit ka doh, hynrei ka jingwad ka jingïatiplem babha sha U Blei da ka jingpynmihpat ïa U Jisu Khrist.” Kane ka dei ka jingpynbaptis ba kynja mynsiem. Ka jingpynbaptis um ka dei ka jingwad jong ka jingïatiplem babha sha U Blei, kaba ktah ym tang ïa ka doh, hynrei ka ngam jylliew ban ïa ka met u briew, haba ka mynsiem jong u ka pyndem rit ïalade ha ka jingkohnguh ïa ka hukum jong U Blei. Hooid, ka met ba kynja doh bad ka jingmut pyrshah lypa kam lah ban iohi ïa kane ka jingshisha.
Ka C.L.Version ka pynkylla khasi ïa kane ka dkhot kumne : “Kine kila long ki mynsiem jong kito ki bym shym la kohnguh ïa U Blei mynba u la ap da ka jingshah slem ha ki sngi ba u Noah u dang shna ïa ka lieng jong u. Ki briew kiba don tang khyndiat ha ka ïing lieng – phra ngut ha baroh – ki la lait im da ka um, kaba long ka dak kaba kdew sha ka jingpynbaptis, kaba pyllait im ïa phi mynta. Kam dei ka jingsait noh ïa ka jakhlia na ka met, hynrei ka jingkular ba la pynlong sha U Blei na ka jingïatiplem babha. Ka pynim ïa phi da ka jingmihpat jong U Jisu Khrist” (1Pet. 3 : 20 – 21). Hato ka jingpynbaptis ka pyndam noh ïa ka Gospel jong U Khrist ? Em kam long kumta. Ha ka jingshisha, dei ha ka jingpynbaptis ba u briew u pynbna ïa ka jingkut jingmut bad jingïadei bad U Blei bad pyni ka jingngeit jong u ha ka jingiap bad jingmihpat jong U Khrist.Ka dei kumta, ka jingpynbaptis katkum ka Baible ka kyntiew burom ïa ka jingaiei jong U Blei. Ka jingpynbaptis ka pynpaw ïa ka jingaiei ba pynim jong U Trai uba la iap bad mih pat da ka jingjop na ka jingtep.
Ka jingbakla jong ka jingpeit shiteng – shiliang
Bun ki briew ki la pop na ka jingbakla bym peit pura. Bad ka jingmut b’la pynmatlah da ka jingbishar lypa bad sngewmeng, ki la dep rai na ka bynta ïalade hi, kaei u briew u tharai ban leh ban ioh lait im. Kum kine ki long kum kita ki hynriew ki briew ba matlah ba tba ïa u hati.Ha ka jingïadei bad ka niam, bun ki briew ki long pop namar ki peit shiteng – shiliang. Ki shon jur ba ka jingngeit ka long tang ma ka ka kyndon jingpynim bad kyntait noh ïa kiwei kiba long kiba donkam bha. Ai ba ki jingduwai jong ngi da ka mynsiem ba sngur bad ba pynrit kan plied ïa ki khmat ba kynja mynsiem ban iohi shai ïa ki sakhi ba shai na ka Baibl bad thew tarajur bha baroh kiba lah ban pynsngew-bha ïa U Blei bad U Khun. U Jisu Khrist hadien ba u la ioh ka bor baroh (na U Kpa) ha ka khyndew bad ha bneng (Math. 28 : 18), u la hukum ïa ki synran ban pynlong synran da kaba pynbaptis (Math. 28 : 19). Hooid ïa ka jingpynbaptis lah ban pdiang tang kito kiba kohnguh ïa ki kyndon baroh shah shkor ïa ka Gospel, ngeit, kylla kaba mut, phla bad pynngam hapoh ka um jingpynbaptis (Mk. 16 : 16).