Kum kane ka jingpawnam, yn ym don ki ban kwah. Tangba hap ban pdiang. Ka sor rit Byrnihat ha Ri Bhoi kaba la ïoh ka kyrdan kaba kham pher bad kaba phylla ha ka ri hi baroh kawei kata ban ïoh rah ïa ka nam ba nyngkong eh ha ka jingjaboh tam jong ka lyer ha baroh kawei ha ri ha ka sien kaba ar kynthih, kata hadien u snem 2023, kata katkum ka kaiphod kaba la pynmih da ka Centre for Research on Energy and Clean Air (CREA). Katkum ka kaiphod na ka CREA, ka Byrnihat ka la long ka sor kaba don ki jaboh ha ka lyer, kiba lah ban ïohi da la ki jong ki khmat. Ka Byrnihat bad ka Samastipur ha Bihar ki la long ar tylli ki sor rit kiba bteng ban bat ïa kane ka kam.
Ka nongbah Delhi ka dei kaba ju paw khubor ha man ka por tlang namar ka jingjaboh jong ka lyer kaba la buh jingeh ïa ki nongshong shnong. Hynrei ki Nongïalam Sorkar ha Delhi lehse mynta kin wiat rymmuiñ ha kane ka kynti ruh namar kam dei shuh ka Delhi, hynrei ka Byrnihat kaba la shim ïa ka kyrdan nyngkong ha ka jingjaboh jong ka lyer. Ym tang ka Delhi, hynrei wat kiwei ki sor heh kiba bun briew bad bun kali bad karkhana, ki lait na ka jingshah pynkiew sha ka kyrdan banyngkong ha kane ka kynti.
Haba phai biang sha ka Byrnihat, ka jingïoh ïa ka nam kum kata ka jaka kaba dap da ka lyer jaboh tam lehse ka lah ban dei ruh na ka jingdon jong bun tylli ki karkhana pynmih tdem hapoh kiba don marjan bad ki shnong ki thaw ha ka jaka jong ka Meghalaya Industrial Development Corporation (MIDC) ïa kaba la tip kum ka Export Promotion Industrial Park (EPIP). Bunsien ki paidbah ka thaiñ Byrnihat ki ju ud ju nam bad kane ka la mih ruh ha ki lad pathai khubor halor ka jingmih jong ka tdem na ki karkhana kaba la pyndik bad pynjynjar shikatdei ïa ki paidbah nongshong shnong khamtam ki khynnah pule kiba la kem pang ruh na katei ka jingpynmih tdem jaboh jong ki karkhana mynshem snem.
Mynshem snem hadien ba la ïohpdiang ïa katei ka nam lahduh, la ïohi ba na ka liang ka Meghalaya State Pollution Control Board ka la shimkhia halor kane bad la bunsien ka la dep ban pynmih ki jingbthah sha kine ki karkhana ba ki dei ban bud ryntih ïa ki kyndon, bad la ïohi ruh ba wat ha ka jingleit hiar jurip jong u Principal Secretary ka tnat Forest & Environment u Sampath Kumar, IAS, ha ryngkat ki ophisar na ka Meghalaya State Pollution Control Board (MSPCB), la lap ba kiba bun ki karkhana kiba don ha Industrial Unit kim shym la bud satia ïa ki kyndon bad ki jingbthah, bad ha kaba ka MSPCB ka la dep ban phah khang noh ïa kiba bun tad haduh ba kin da lah ban pynbiang nadong-shadong katkum ki jingbthah ka Board. Hynrei ka jingkylli kaba mih mynta, ka long balei ym lah ban leh eiei haduh ban hap ban ïoh bad bteng ban bat biang ïa ka khusnam kaba nyngkong.
Ngi la ïohi da ki khmat haba ngi leit sha Guwahati katno ka Byrnihat ka lynguh namar ki karkhana. Ha ka por lyiur, nalor ka jingkhluit jong ka sngi, ngi mad ruh ïa ka jingkhluit namar ka jingpynmih tdem ka bashyrkhei na ki atoskhana jong ki karkhana bapher-bapher. Hooid, ngi donkam ïa ki karkhana, hynrei ngi dei ban peit ruh ba ka jingpynmih tdem kam dei ban long shaba palat haduh ba kan da ktah ïa ka koit ka khiah jong ki nongshong shnong bad ki jingthung jingtep. Na ka liang ka sorkar jylla bad ka Meghalaya State Pollution Control Board ki dei ban shim noh ïa ki sienjam ban pynduna ïa ka jingpynmih tdem da ki karkhana. Ïa kito ki karkhana kiba la ïaid lait na ki kyndon kiba ïadei bad ka jingpynmih tdem, la dei ban khang tala noh shwa khnang ban kham khuid ka lyer. Ïa ki karkhana ki bym shim ïa kino-kino ki sienjam ban pynduna ïa ka jingpynmih tdem, dei ban pynduh noh syndon ïa ka laisen jong ki bad khang dam shi lynter. Lada kim khang hi da ka mon lade, ka sorkar ka dei ban pynduh noh ïa ki jingai jingïarap lane ‘subsidy’ sha kine ki karkhana kiba long pynban kum ki shlem ba shim ïa ka jingim briew.
Ngim lah ban ïapeiñ ïa ka koit-khiah jong ki nongshong shnong bad ka jingbuh karkhana. Na ka por sha ka por, ngi la ïakren ïa ka jingdonkam ban pynkhuid ïa ka lyer bad ïa ki um ki wah khamtam ha ki jaka ba don ki karkhana namar ka ktah jur ïa ki briew. Kan myntoi aïu ban ïohlum khajna na kita ki karkhana lada ym lah ban ïada shwa ïa ka jingim jong ki nongshong shnong? Ngi tip ba kine ki karkhana ki ïoh ruh ïa ki jingïarap lane ‘subsidy’ na ka sorkar bad namarkata, kin hap ban shim jingkitkhlieh ban pynduna ka lynguh ïa ki shnong ki thaw da ka tdem kaba long bih.
