Shillong, K’lyngkot 27
U Symbud Myntri Rangbah ka Jylla ba khmih ïa ka kam Pynroi Sor, Bah Sniawbhalang Dhar, u la pynthikna ba ka Sorkar kan kynthup lut ïa baroh kiba don bynta ha kaba ïadei bad ka jingpynkynriah ïa kiba shong die madan ha ka jingshim ïa kano-kano ka rai.
Haba kren bad ki lad pathai khubor ha ka Lah Sngi U Blei, u Bah Dhar u la ong ba kiei-kiei kiba ka Sorkar ka leh kan long katkum ki kyndon jong ka aiñ.
“Ngin pyrshang ban kynthup lang ïa baroh ha ka jingshim rai”, u la ong.
Kane ka jingkren u Myntri ka long hadien ba ka Meghalaya & Greater Shillong Progressive Hawkers & Street Vendors Association (MGSPHSVA) ka la byrngem ban pynlong da ka jingïakhih lada ka Provisional Town Vending Committee (PTVC) kam lum kyrkieh ïa ka jingïalang.
Ka Synjuk jong ki nongdie madan ka la dawa ruh ba dei ban weng noh mardor ïa ka jingpynbna paidbah bad ban pynduh-pyndam noh baroh ki kam kiba la leh da ka PTVC, ïa kaba ki la kynnoh ba ka dei ka kynhun kaba be-aiñ, nalor ka jingsdang ïa ki jingkam bad jingpyrshah (claims and objections) bad ka jingthaw ïa ka thup kyrteng jong ki nongdie madan kiba dei ban ïoh ïa ka syrnot die jingdie.
“Hooid, lada ki don kino-kino ki jyrwit-jyrwat, ngin ïa pynbeit lang ïa kata, ki lah ban don ki mat ha ki katto-katne ki jaka ngi long kiba kloi ban ïapynbeit”, la ong u Symbud Myntri Rangbah.
U Bah Dhar u la ong ba ka jingkhang jong ka Sorkar ka plie beit na ka bynta ban shong jingïalang ban ïasyllok bad kito baroh kiba don bynta ha ka kam, hynrei ka jingmut jong ka sorkar hi ka long ba ka kwah ban pynkynriah sha katto-katne ki jaka kiba kongsan na ka bynta ka bha ka miat jong ka sor bad na ka bynta ka bit ka biang jong ka leit ka wan ki paidbah.
“Lada ka don kano-kano ka jingpyrshah na ka liang jong ki, ngin sa pynlong ïa ka jingïasyllok. Ngi long kiba kloi ban pdiang ïa ki bad kam don satia ka jingeh ban ïakynduh bad ban ïakren bad ki”, la bynrap u Bah Dhar.
