
Shillong, K’lyngkot 27
Ka Mawlai ka dang sah sa tang shisien jam hadien ba ka la lah ban pynthikna ban jam sha ka final ha ka sien kaba nyngkong eh ha ka Meghalaya State League ba la pynïaid da ka Meghalaya Football Association.
Kane ka jinglah ban pynthikna ka la wan hadien ba ka la lah ban pynliem noh ïa ka Ladthadlaboh da 1-0 kol ha ka jingïakhun semifinal kaba nyngkong kaba la long ha ka Lah Sngi U Blei ha SSA Stadium kaba ha First Ground, Polo.
Kane ka nam jop ka la wan urlong lyngba ka shi kol ba la thep da u Damanbhalang Chyne ha ka minit kaba 29 bad ban pynkut noh shi syndon ïa ka jingïaid lynti ka Ladthadlaboh ha ka lympung wat la ka la lah ban ïalehkai bha lyngba ka jingdon ïa ki rangïalehkai kiba kynsai.
Ka Mawlai, kaba la shah pynliem noh ha ka semi final ha u snem 2023, kan ïakynduh pyrshah ïa ka kynhun kaba jop ha ka semifinal ba ar ka ban long mynta ka Sngi Ba-ar hapdeng ka Rymbai Shkenshynriah bad ka Shillong Lajong ha Wahïajer Multipurpose Sports Complex. Kane ka jingïalehkai kan long ha ka por 1:30 baje nohphai sngi.
Kumba ka paw ka Lajong ka long ka kynhun kaba la rah teng ïa ka nam lahduh ha kane ka lympung ha u snem 2019, katba ka Shkenshynriah ka dang dei ka sien kaba nyngkong ban rung sha ka semifinal. Te kumta ka la khmih lynti ban ïalehkai bha khnang ban ïoh rung sha ka final.
Ïa kane ka lympung la kyrshan lang da ka tnat ïalehkai jong ka Sorkar Jylla bad ïa ka jingïakhun final la buh ban pynlong ha Wahïajer ha ka Sngi Saitjaiñ (1 tarik u Rymphang).