
Jowai, K’lyngkot 27
Ka Brother Enterprises FC bad Rymbai Shkenshynriah SC ki la jam sha ka quarter final ha ka lympung ïalehkai ’11th Pdengshakap Secondary School Invitation Football Knockout Tournament” ba la pynïaid da ka Dorbar Shnong Pdengshakap.
Kane ka la wan hadien ba kine kynhun ki la ïoh jingjop ha ka jingïalehkai jong ka wat ba ar (2nd Round) kaba la long ha madan Pdengshakap ha ka 25 tarik mynta u bnai.
Ha ka jingïalehkai kaba nyngkong, ka Brother Enterprises FC ka la pynliem noh ïa ka Kynrumlang-i FC lyngba ka tie-breaker da 5-4 hadien ba kim shym la lah ban pynkhih jar haduh kaba kut ka jingïalehkai.
Haba phai pat sha kawei ka jingïakhun, ka Rymbai Shkenshynriah SC ka la jop ïa ka Amlanai YB da 2-0 kol. Ïa kine kol la thep da u Jeremy Nongtdu ha ka minit kaba 52 bad u Hesmiky Rymbai (54).
Ka jingïalehkai jong ka wat ba ar kan bteng ha ka Sngi Saitjaiñ hapdeng ka Synroplang FC pyrshah ïa ka Nangbah Mulang SC ha ka por 12 baje mynsngi, katba ka Golden Lion FC (Rymbai) ïa ka Namrhenlang-i FC ha ka por 2 baje nohphai sngi.