Shillong, K’lyngkot 27
Ka Kong Ampareen Lyngdoh kaba dei ka Nongïalam ka National People’s Party (NPP) bad ruh ka Myntri Sorkar Jylla ka la kyrpad ïa ki paidbah ba kim dei ban ngeit ïa ki jingkynnoh bad ki jingkren khlem nongrim jong ki briew.
“Ngin peit ba u pud u sam ban lah ban pynbeit noh shwa jong u 2028, ngin peit ba kan ym don kum kata ban kynnoh ba ngi la die ïa la ka jong ka jaka puta, ka ri bad ka jaidbynriew ne ban pynkheiñ ïa ka ‘Land Transfer Act’. Wat ju ngeit ïa ki briew kiba kynnoh bad kren khlem nongrim namar dei ma ngi kiba la jied da U Blei ban ïeng ban ïada ïa ka jaidbynriew jong ngi. Hooid, phin kynnoh phi dei ban don ka jingshaniah ba kano-kano kaba ngi leh, ngi leh tang da kawei ka jingthmu bad kata ka long ban rah ïa ka jaidbynriew Khasi, Pnar bad Garo sha kawei pat ka kyrdan,” la ong ka Kong Ampareen haba kren bad ki lad pathai khubor ha ka jingleit synran ïa u Bah Fantin J Lakadong ban leit pyndep ïa ka jingthep kyrteng ban ïakhun ïa ka ilekshon MDC.
Ka Kong Ampareen ka la ong ba kum ka NPP mynta ka la rai ba kan pynduna katba lah ban ïa kawang ktieh bad ban kynnoh iwei ïa iwei bad yn kren tang ïa ki kam kiba la leh bad kiwei ki seng kin don la ki jong ki nongrim.
“Ngi khlem leh donbor, ka rukom treikam ha ka Sorkar MDA ka la long kaba skhem bad kaba biang nongrim, ka NPP kan ïoh beit ka jingkyrshan na ki seng ba ïatreilang,” ka la ong bad bynrap “Bun kiba sngew rem bad kynnoh ba ngi thombor ba ngi ong ba khlem ka jingïatreilang bad ka Sorkar Jylla kano-kano ka Executive Committee ha ki ADC kan poi ha kaba eh, kam pher ka jingkynnoh, ngin trei shitom bad ki kyrtong ngi la dep pynbna bad kyrmen ba iwei-pa-iwei kyrtong kin rah shakhmat ïa ki mat ba ka seng ka la buh.”
Shuh shuh, ka Kong Ampareen ka la ong, “Ki kam pynroi ym tang kawei phi la ïohi sawdong, ki pyni bad ïeng sakhi ba ka jingkhana bad jingkynnoh kiwei ki seng, ka dei hi ka rukom ban leh. Ngin ïaid ngin tur shakhmat bad ngi kyrmen ba U Blei un kyrkhu ïa ki kyrtong, ïa ka seng bad un ïalam lynti ïa ngi bad ai jingtip jingstad ban saiñ pyrthei ha ka rukom kaba bit ba biang.”
“Ngim ju kwah ban kynnoh, ka sngi ba nyngkong ba thep kyrteng ngin ym kynnoh ïano-ïano, hynrei ka ri kam dei tang jong kawei ka seng, ka ri ka dei lang jong ngi baroh bad baroh ki nongïalam hadien ba jop ïa ka ilekshon dei ban ïaid shakhmat da kawei ka jingthmu ban ïada bad pynkiew ïa ka imlang ka sahlang,” la ong ka Kong Ampareen.
