Yn ïoh thep ‘vote’ palat 13 lak ngut ha KHADC bad JHADC

Ka KHADC kaba don 29 tylli ki konstitwensi ka don 9,96,518 ngut ki nongthep 'vote' kiba kynthup 4,81,268 ngut ki shynrang bad 5,15,247 ngut ki kynthei.

Shillong K’lyngkot 27

Palat 13 lak ngut ki nongthep ‘vote’ kin ïoh ban thep ‘vote’ ha kane ka ilekshon sha ka Ïingdorbar Khasi Hills Autonomous District Council (KHADC) bad Jaiñtia Hills Autonomous District Council (JHADC) ha kaba ka jingthep ‘vote’ kan long ha ka 21 tarik Rymphang.

Katkum ka thup kyrteng ki nongthep ‘vote’ ha baroh ar tylli ki District Council kaba la pyllait ha ka Lah Sngi U Blei, la pyni ba baroh ki nongthep ‘vote’ ki don 13,08,818 ngut kiba kynthup 6,32,347 ngut ki shynrang bad 6,76,467 ngut ki kynthei.

Ka KHADC kaba don 29 tylli ki konstitwensi ka don 9,96,518 ngut ki nongthep ‘vote’ kiba kynthup 4,81,268 ngut ki shynrang bad 5,15,247 ngut ki kynthei.

Ka JHADC ruh ka don 29 tylli ki konstitwensi tangba ka kham rit ban ïa ki konstitwensi kiba don ha KHADC. Ka JHADC ka don 3,12,300 ngut ki nongthep ‘vote’ ha kaba 1,51,079 ngut ki dei shynrang bad 1,61,220 ngut ki kynthei.

Ki don ruh  4 ngut ki nongthep ‘vote’ bym dei kynthei shynrang ha kaba 3 ngut ki dei na KHADC bad 1 na JHADC.

Ïa ka jingpynbna ban pynlong ïa ka ilekshon sha ka Ïingdorbar KHADC bad JHADC la pynmih da u Commissioner and Secretary ka tnat District Council Affairs u Bah C.V.D. Diengdoh ha kaba la khot ïa baroh ki konstitwensi kiba hap ha KHADC bad JHADC ban jied ïa ki dkhot sha baroh ar tylli ki Ïingdorbar.

Ka jingthep kyrteng kan kut ha ka 3 tarik Rymphang haduh 3 baje janmiet, bad jingpeit bniah ïa ki kot ki sla jong ki kyrtong ka dei ha kane hi kajuh ka sngi hadien ka 3 baje janmiet.

Ka tarik khatduh ban weng kyrteng ki kyrtong ka dei ha ka 4 tarik Rymphang bad ka sngi ban rai bad pynmih ïa ki kot ki sla jong ki kyrtong kiba biang lut ki kot ki sla bad ka jingaiti ïa ka shap jong ki kyrtong kan long ha ka 6 tarik Rymphang.

Ka jingthep kyrteng ki kyrtong ba ïakhun ïa ka ilekshon MDC ka la sdang naduh ka Lah Sngi U Blei 27 tarik. Ha kane ka sngi banyngkong ki la don lai ngut kyrtong kiba la poi ban thep kyrteng na ka bynta ka ilekshon sha KHADC ha East Khasi Hills. Uwei u kyrtong u la leit ban thep kyrteng ha ISBT kaba don ha Mawïong bad ar ngut pat ki la thep kyrteng ha shlem treikam jong ka Deputy Commissioner, EKH.

Uwei na ki kyrtong ba la mih shakhmat ban pynthikna aireng ha kane ka ilekshon u dei MDC ka Malki-Laitumkhrah, Bah Fantin J Lakadong na ka seng National People’s Party (NPP). Ha kane ka sngi la synran lang ïa u Bah Fantin da ka kurim kaba dei ka Myntri hapoh ka Sorkar, Kong Ampareen Lyngdoh bad ki nongkyrshan.

Haba kren hadien ba la pyndep ïa ka jingthep kyrteng ha ISBT, Mawïong, u Bah Fantin u la pynpaw ba u sngew skhem ba ki paidbah kin ai biang ka jingshaniah ha u ha kane ka kynti.

U la ong ba ha kine hynriew snem ba la leit, u la leh shibun ki kam bad kaba u kwah eh ka long ba ka ktien Khasi kan rung ha ka Khyrnit ba Phra ka riti synshar jong ka ri.

Halor ka jingshah kynthoh ka seng ba u ïakhun, u la ong ba ka jingkynnoh ka don beit ha ka politik hynrei ka shong ha u briew namar ba ka seng kam dei kaba donkam.

Ha kajuh ka por, u la ong ba u sngew donbok ba ka MLA kaba dei ka kurim jong u, Kong Ampareen Lyngdoh ka ai ka jingkyrshan bad ka jingtrei kaba radbah kumba la khmih lynti ki paidbah.

Uwei pat u kyrtong ba la thep kyrteng ha kane kajuh ka sngi dei u Dr. O.S Jyrwa uba la thep kyrteng kum u kyrtong shimet ban aireng na Sohryngkham konstitwensi.

Haba kren hadien ba la dep thep kyrteng, u Dr Jyrwa u la ong ba ka jingmih jong u shakhmat ban ïakhun ïa ka ilekshon MDC ka dei hadien ba ki paidbah ka konstitwensi ki la ai mynsiem ïa u ba u dei ban mih shakhmat ban tynrong ïa ka jingeh ki paidbah.

U Dr Jyrwa u la ïakhun ruh ïa ka ilekshon MLA na Mawryngkneng ha u snem 2023 na ka seng UDP, ha kaba u la wan ba ar, bad ha kane ka kynti ba mynta u khmih lynti ban ïoh ïa ka jingjop kum u MDC.

Sa uwei pat u kyrtong ba la pyndep ïa ka jingthep kyrteng ha DC ophis dei u Bah Daniel Wahlang uba la mih kum u kyrtong shimet na Mawsynram konstitwensi.

U Bah Daniel u dei u nongïalam barim ka BJP. U dei uwei na ki rangbah ka thaiñ Mawsynram uba la ju ïadon bynta ha ki kam hapoh ka imlang-sahlang bad ha ki kam paidbah bad kum u nongïalam sengbhalang ha ki por mynshwa.

U la ong ba ka dawbah kaba la ktik ïa u ban mih madan ha kane ka ilekshon ka dei namar ba u don ka thong ban pynkhlaiñ bad pynskhem ïa ka riti dustur, ki bor synshar hima, bor shnong, bad ki raid.

U la ong ba um lah shuh ban shu peitkai ïa ka jingleh jong ki MDC ha kine ki snem ba la leit, da kaba pynpaw ruh ba ka donkam ïa ki aiñ kiba biang bad kiba khlaiñ ban pynkhlaiñ ïa ki hima, ki raid, ki shnong.

Ha kajuh ka por, u la ong ba ki aiñ jong ki shnong ki shu kut noh tang hapoh shnong bad ym don bor shabar bad kane ka long kaba mynsaw bad ka ap jingma.